Z 1 pa 25 lipienia ŭ Minsku prachodziła hramadskaje abmierkavańnie detalovaha płana raźvićcia terytoryi ŭ miežach Łahojskaha trakta — vuł. Siadych — vuł. Kiedyški — vuł. Słavinskaha — paŭnočnaj miažy łandšaftna-rekreacyjnaj zony 320ŁR, paviedamlaje realt.by.
Na miescy pustki pa vuł. Kalinoŭskaha, dzie ciapier prachodzić linija elektrapieradač, horadabudaŭniki prapanavali ŭźvieści try žyłyja kompleksy: «Vieniecyja», «Małanka» i «Haradskaja ściana», apuściŭšy ŁEP pad ziamlu. Žycharoŭ mikrarajona taki raskład nie zadavoliŭ, i jany nakiravali ŭ administracyju 5690 podpisaŭ suprać realizacyi prajekta.
Horadabudaŭničy saviet razhledzieŭ zvaroty minčukoŭ i paličyŭ ich słušnymi: kvatery ŭ novabudoŭlach, jakija byli zaprajektavanyja na hetaj terytoryi, nie zabiaśpiečvalisia sacyjalnaj infrastrukturaj. Miescaŭ u dziciačych sadkach, škołach i paliklinikach žycharam novych damoŭ nie chapiła b. Ciapier prajekt adpraŭleny na dapracoŭku. Nieviadoma, jakija źmieny ŭniasuć u jaho horadabudaŭniki, ale žychary rajona prapanoŭvajuć im raźbić na miescy pustki skvier imia pieršaha prezidenta Biełarusi.
«My chočam prapanavać horadu paśla kabliravańnia ŁEP uzdoŭž vuł. Kalinoŭskaha na ŭčastku pamiž vuł. Kiedyški i Łahojskim traktam uładkavać bulvar abo skvier i raźmiaścić tam spartyŭnyja placoŭki, jakich vielmi nie chapaje. Tak jak azielanienaja terytoryja, ab jakoj idzie havorka, znachodzicca na vulicy, nazvanaj u honar Kastusia Kalinoŭskaha, znakavaj asoby ŭ historyi Biełarusi, a taksama ŭličvajučy rolu kiraŭnika dziaržavy ŭ stanaŭleńni sučasnaj niezaležnaj Biełarusi i jaho padtrymku raźvićcia dastupnaha dla moładzi sportu, ličym, što budučy skvier abo bulvar pavinien nasić imia pieršaha prezidenta Biełarusi», — prakamientavała Ludmiła Bialajeva-Hundoryna, pradstaŭnica inicyjatyŭnaj hrupy.
Kamientary