«Lepš by zrabili 12 bałaŭ, jak va Ukrainie» — deputat i nastaŭnica pra viartańnie 5-balnaj sistemy acenak
Vice-premjer Vasil Žarko paviedamiŭ, što razhladajecca ideja zamianić siońniašniuju 10-balnuju sistemu adznak staroj, 5-balnaj. Maŭlaŭ, da 10-balnaj sistemy šmat pytańniaŭ, jana nie abjektyŭnaja.
Ideju padtrymaŭ i staršynia parłamienckaj kamisii pa adukacyi, kultury i navucy Ihar Marzaluk. Jamu, maŭlaŭ, uvohule chapiła b i čatyroch bałaŭ.
«Naša Niva» pacikaviłasia inšymi mierkavańniami na hetuju temu.
Hanna Sieviaryniec, vykładčyca Smalavickaj rajonnaj himnazii
«Lepšaja sistema, kaniečnie, 10-balnaja. Jana, kali ŭ ideale, tak jak była raspracavanaja, pradumanaja i prapisanaja ŭ narmatyŭnych dakumientach, to sistema bolš pierśpiektyŭnaja. Ja navat zajzdrošču ŭkraincam, u jakich 12-balnaja sistema, dobra b, kab i ŭ nas takaja była, ja tak liču.
Mnie zručna karystacca 10-balnaj sistemaj. Ale, kaniečnie, jana pracuje nie tak, jak zadumana. Bo my ŭsie pryjšli z toj 5-balnaj sistemy i majem saviecki pohlad.
Sistema z 10 bałami raspracavanaja jak hraduśnik, prosta hradacyja. A my pa savieckaj zvyčcy ŭsprymajem, što 2 i 3 — drenna, treba, kab było 8, 9 i 10. My iznoŭ pieratvaryli narmalnuju sistemu adznak u niejki instrumient manipulacyi. I tamu siońnia 10-balnuju sistemu vykarystoŭvajuć tak, što pamiž joj i 5-balnaj niama vialikaj roźnicy».
Alena Anisim, movaznaŭca, deputat Pałaty pradstaŭnikoŭ, čalec parłamienckaj kamisii pa adukacyi, kultury i navucy
«Ja staŭlusia nieadnaznačna da idei viartańnia 5-balnaj sistemy. U nas jość prablemy ŭ adukacyi, ale jany tyčacca nie stolki adznak, kolki ŭzroŭniu adukacyi. A takija reformy nie ŭpieršyniu prachodziać, uzhadajcie pierachod na 12 hadoŭ navučańnia.
Z adnaho boku, my ŭstupajem u Bałonski praces, z druhoha — iduć razmovy to pra admienu testaŭ, to pra 5-balnuju sistemu. Ja prychilnik taho, što kali štości robicca, to treba razumieć, navošta heta robicca i jaki vynik čakajem. I rabić zapłanavanaje pakrokava. A chistańnie, krok napierad, dva nazad, ja nie razumieju. Heta nie pryniasie vyniku, bo heta subjektyŭnaje mierkavańnie. Tamu ja, chutčej, suprać viartańnia 5 bałaŭ. Kali niekatoryja škoły pryjšli da vysnovy, što im ciažka pracavać z 10 bałami — to viarnicie staruju sistemu dla tych niekalkich škoł i ŭsio.
A tak my prosta biaskonca robim chaatyčnyja stychijnyja rečy, jaki nie majuć ničoha supolnaha z raźvićciom».
Kamientary