U sudzie Centralnaha rajona Minska prajšoŭ razhlad spravy Viačasłava Kasinierava, jaki źviarnuŭsia z pazovam ab abaronie hodnaści i kampiensacyi maralnaj škody.
Adkazčykami byli «Ahulnanacyjanalnaje telebačańnie» i viadučaja jaho teleprahrammy «Našyja naviny» Kaciaryna Tyškievič, Ministerstva ŭnutrannych spraŭ i načalnik minskaj milicyi Alaksandr Barsukoŭ.
Nahodaj staŭ videasiužet «Chulihan-anarchist, jaki apahaniŭ skulpturu haradavoha ŭ Minsku, zastaniecca ŭ SIZA da rašeńnia suda», u jakim, jak ličyć Viačasłaŭ Kasinieraŭ, viadziecca havorka pra jaho. Bo mienavita jon nakinuŭ na šyju palicejskamu-haradavomu piatlu, znachodziŭsia ŭ SIZA padčas vychadu prahramy i byŭ pryznany palityčnym źniavolenym šeraham biełaruskich pravaabarončych arhanizacyj.
U telesiužecie situacyju kamientavaŭ načalnik HUUS Minharvykankama Alaksandr Barsukoŭ, jaki miž inšym adznačyŭ:
«Heta prosty chulihan, na jakim klajma niama dzie stavić, pa vialikim rachunku».
Viačasłaŭ Kasinieraŭ ličyć, što skazanaje Barsukovym nie adpaviadaje rečaisnaści, bo ŭ momant vychadu telepieradačy jon tolki adnojčy pryciahvaŭsia da kryminalnaj adkaznaści.
Viačasłaŭ Kasinieraŭ prasiŭ sud pryznać źviestki, što byli raspaŭsiudžanyja ŭ telesiužecie, nie adpaviednymi rečaisnaści, abaviazać adkazčykaŭ zrabić abviaržeńnie i spahnać ź ich 3 000 rubloŭ u jakaści kampiensacyi maralnaj škody.
Adkazčyki asprečvali zajavu: u siužecie ANT nie było asabistaj infarmacyi (imia, źviestki pra baćkoŭ, hramadzianstva, adras), zhodna ź jakimi možna było b identyfikavać taho, pra kaho išła havorka.
U vyniku sud admoviŭ Kasinieravu ŭ zadavalnieńni jaho isku.
Nahadajem, Viačasłavu Kasinieravu było vystaŭlena abvinavačvańnie ŭ ździajśnieńni złačynstva pa častcy 1 artykuła 339 Kryminalnaha kodeksa (chulihanstva) za praviedzieny im 12 sakavika 2017 h. kala budynku MUS pierformans, padčas jakoha jon nakinuŭ piatlu na ŭstalavanuju tam statuju palicejskaha-haradavoha, vykazaŭšy takim čynam svoj pratest suprać milicejskaha samavolstva i pieraśledu aktyvistaŭ anarchisckaha ruchu za ŭdzieł u mirnych akcyjach pratestu. Sud Maskoŭskaha rajona pakaraŭ aktyvista štrafam u piać bazavych vieličyń.
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy16
Kamientary