Śviatłana Kalinkina: Čamu ŭkrainski parad vyklikaje zachapleńnie
U stalicy Ukrainy adbyŭsia parad u honar 26-j hadaviny niezaležnaści Ukrainy. Čamu ŭkrainski parad vyklikaje kamiak u horle, a biełaruskija — horkuju ironiju?
Pa-pieršaje. Parad u Kijevie prachodziŭ sapraŭdy ŭračysta. A heta značyć, strymana, jak toje naležyć dziaržaŭnamu śviatu. Biez kiču ŭ vyhladzie siejałak-viejałak-žyvych piramid sa studentaŭ i studentak i ŭračystaha pravozu ŭnitazaŭ jak najvyšejšaha dasiahnieńnia ajčynnaj pramysłovaści.
Pa-druhoje. Ukrainski parad — heta było nie prosta pieramiaščeńnie šychtoŭ, što čakaniać krok. Heta byŭ parad, napoŭnieny sensam. Na im atrymlivali załatyja zorki novyja Hieroi Ukrainy. Uračysta, na vačach va ŭsioj krainy.
Na im atrymlivali ściahi i nazvy vajskovyja padraździaleńni. Imia karala Daniła, imia Čornych zaparožcaŭ… Ukrainskija nazvy, ukrainskija hieroi. Jak słava nacyi, honar nacyi, estafieta mužnaści i patryjatyzmu, jakaja idzie praz stahodździ…
U Biełarusi takoj praktyki prosta niama. U nas Hierojami Biełarusi stanoviacca ŭ cišy kabinietaŭ. U nas čamuści jość Vienskaja desantnaja bryhada, Naŭharodskaja, Tylzicki połk… Ale niama vajskovych padraździaleńniaŭ imia Davyda Haradzienskaha, kniazia Vitaŭta, Michała Hlinskaha, Kanstancina Astrožskaha, Tadevuša Kaściuški…
Treciaje.
Pakłaŭšy ruku na serca: u kaho jość upeŭnienaść, što biełaruskaja armija budzie abaraniać biełaruski suvierenitet, kali Rasija raptam vyrašyć, što tut, u nas, taksama kryŭdziać ruskich? Kali b zdaryłasia niešta padobnaje tamu, što adbyłosia ŭ Krymie ci na Danbasie?
Ni ŭ kaho takoj upeŭnienaści niama. Jość tolki nadzieja.
A voś na paradzie ŭ Kijevie strajavym krokam išli tyja, chto ŭžo vyrazna vyznačyŭsia, na čyim jon baku, i jakuju hatovy abaraniać radzimu. Išła armija, jakaja ciažka, z kryvioju i vialikimi stratami pazbaviłasia ad zdradnikaŭ.
Našaj armii, kab zrazumieć, chto jość chto, nie treba čakać svajho Danbasa. Kab vyjavić patencyjnych zdradnikaŭ, treba pieravieści siłavyja struktury na nacyjanalnuju biełaruskuju movu. Usie, chto nie razumieje, navošta heta robicca; usie, chto nie padtrymaje, zapratestuje, pačnie supracivicca — patencyjnyja zdradniki i jość.
Čaćviortaje. Va Ukrainy vielmi pryhožy himn. Va Ukrainy vielmi pryhožy ściah. Himn, jaki chočacca śpiavać. Ściah, jaki chočacca abaraniać. U biełarusaŭ takija simvały adabrali.
I daŭno zrazumieła, što treba viarnuć. Tamu što biez «Pahoni», biez nacyjanalnaha bieł-čyrvona-biełaha ściaha, biez «Žyvie Biełaruś!», što idzie ad serca, my mankurty, trava pry darozie roznych impieryj.
Biez usiaho hetaha ŭ nas niama idei, jakaja moža abjadnoŭvać.
«Mužnaść naradžaje pieramožcaŭ, adzinstva naradžaje niepieramožnych», — skazaŭ siońnia ŭ pramovie na paradzie Piatro Parašenka.
Dyk voś, biełaruskija parady ŭ lepšym vypadku demanstrujuć patencyjał mužnaści, ukrainski parad prademanstravaŭ patencyjał niepieramožnaści. A heta vielizarnaja roźnica!
Nu i piataje. Prezident Ukrainy ŭ pramovie na paradzie vyrazna paznačaje kurs, kudy viadzie svaju dziaržavu — ŭ Jeŭrasajuz i NATA.
Kudy Łukašenka viadzie Biełaruś?.. Jon i sam nie viedaje. Prosta viadzie — ad paradu da paradu.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary