Paŭnočnaja Kareja papiaredziła, što novyja sankcyi AAN tolki dazvolać joj chutčej zaviaršyć svaju jadziernuju prahramu, paviedamlaje VVS.
MZS krainy ŭ vielmi žorstkich vyrazach nazvaŭ novy pakiet uviedzienych suprać jaje abmiežavańniaŭ «samym žorstkim, nieetyčnym i biesčałaviečnym varožym aktam».
Miž tym ZŠA i Paŭdniovaja Kareja praviali sumiesnyja vajenna-pavietranyja vučeńni ŭ niebie nad Karejskim paŭvostravam.
Pytańnie Paŭnočnaj Karei stanie klučavym u paradku dnia pasiadžeńnia Hienieralnaj asamblei AAN, jakaja adkryvajecca na hetym tydni.
U piatnicu Pchieńjan zapuściŭ čarhovuju rakietu nad terytoryjaj Japonii, nazvaŭšy heta samym vialikim vyprabavańniem na dalokaść. Hety zapusk, vyrableny adrazu paśla pryniaćcia pakieta novych sankcyj u dačynieńni da paŭnočnakarejskaha režymu, byŭ adzinahałosna asudžany Radaj biaśpieki AAN jak «nadzvyčaj pravakacyjny».
«Aktyvizacyja namahańniaŭ ZŠA i ich vasałaŭ z tym, kab nakłaści sankcyi i ŭzmacnić cisk na KNDR, tolki paskoryć raboty pa daviadzieńni da kanca dziaržaŭnaj jadziernaj prahramy», — havorycca ŭ zajavie MZS Paŭnočnaj Karei, apublikavanaj dziaržaŭnymi ŚMI krainy.
U hetaj zajavie taksama śćviardžajecca, što meta novych sankcyj, pryniatych Radaj biaśpieki AAN 11 vieraśnia — «fizičnaje źniščeńnie» nasielnictva krainy, jaje dziaržaŭnaj sistemy i ŭrada.
Hetyja sankcyi byli pryniatyja ŭ sprobie pazbavić Paŭnočnuju Kareju paliva i dachodaŭ ad prodažu ŭzbrajeńniaŭ, a taksama abmiežavać impart naftapraduktaŭ i całkam zabaranić ekspart tekstylu.
Hetyja miery byli ŭviedzienyja paśla užo šostaha pa liku i samaha mahutnaha jadziernaha vyprabavańnia, praviedzienaha Pchieńjanam u pačatku vieraśnia.
Adnak krytyki sankcyj staviać pad pytańnie efiektyŭnaść takoha rodu abmiežavańniaŭ, bo Paŭnočnaja Kareja pa-raniejšamu maje mahčymaść handlavać z navakolnym śvietam.
Kamientary