Ćviordych masłaŭ mnohija ŭsio jašče krychu pabojvajucca: jany ž ćviordyja, jak ich mazać? Choć nasamreč ź imi ŭsio vielmi prosta i, hałoŭnaje, ekanomna. Nie kažučy pra ich 100-pracentnuju naturalnaść — sapraŭdnuju, a nie psieŭda.
Doktar-fizijaterapieŭt i fitaterapieŭt, kaśmietyk Taćciana Hančar kaža, što i ŭ žyćci, i ŭ pracy ŭžyvaje roznyja masły i alei, tamu śmieła raić rabić toje ž inšym. Bo i ceny adekvatnyja, i za jakaść hałava nie balić. Adšukać ich možna jak u aptekach, tak i ŭ zvyčajnych kramach.
Razam z Taćcianaj my skłali nievialički hajd pa asnoŭnych masłach, karyści jakich časam prosta dzivu daješsia.
Što treba viedać pra batery
Baterami nazyvajuć naturalnyja ćviordyja raślinnyja masły. Hetuju ćviordaść im daje vysoki pracent utrymańnia hlicerydaŭ nasyčanych kisłot. U baterach šmat stearynavaj i aleinavaj kisłot, jakija palapšajuć kletačny abmien i ŭmacoŭvajuć ścienki sasudaŭ. A heta, u svaju čarhu, spryjaje lepšamu sintezu kałahienu, i skury praściej utrymlivać vilhać.
Karystacca baterami vielmi prosta: treba adkałupnuć kavałačak masła vymytymi rukami i sahreć jaho ŭ dałoniach. Kali praz adnu ci dźvie chviliny masła stanie vadkim, jaho možna nanosić na cieła. Pryčym dobraje masła nie pakidaje na skury tłustaj plonki.
Kali paraŭnoŭvać batery sa zvykłymi kremami, to pieršyja vyjhrajuć pa mnohich pryčynach. Bolšaść kremaŭ tannaha siehmientu robiacca na minieralnych masłach. Nakont taho, nakolki jany karysnyja, uvieś čas iduć sprečki, ale, jak ni kruci, minieralnaje masła — pradukt, štučna stvorany ŭ vyniku pierapracoŭki nafty. Hetym nie papraknieš całkam naturalnyja batery, jakija da taho ž davoli šmatfunkcyjanalnyja.
Ćviordaje masła možna vykarystoŭvać jak dzionny ci načny kremy, srodak dla źniaćcia makijažu, asnovu dla inšych kaśmietyčnych srodkaŭ. Batery cudoŭna spraŭlajucca z prafiłaktykaj apiokaŭ, bo mnohija masły — pryrodnyja filtry ad ultrafijaletu. Akramia taho, masły mohuć vyrašyć prablemu łomkaści paznohciaŭ i nadać vałasam hładkaść i zdarovy dahledžany vyhlad.
Usie batery ŭvilhatniajuć, razhładžvajuć, uzbahačajuć skuru, ale ŭ kožnaha jość i svaje ŭnikalnyja jakaści, pra jakija i pojdzie havorka nižej.
Pra karyść samych užyvalnych ćviordych masłaŭ
Kakosavaje
Kakosavaje masła vydatna padychodzić dla masažu, asabliva dzieciam. U zvyčajnych dziciačych kremach choć i ŭtrymlivajucca naturalnyja alei, ale ž robiacca hetyja srodki ŭsio adno na minieralnych masłach. Lepš, kali ŭ skuru ŭbirajucca całkam naturalnyja rečyvy, tady my majem karyść i ad samoha masažu, i ad karysnych dadatkaŭ.
Nielha nie zhadać, što kakosavaje masła zdaŭna vykarystoŭvajuć dla zahojvańnia ran, zachvorvańniaŭ skury. Masłam azdaroŭlivajuć pasiečanyja končyki vałasoŭ, vykarystoŭvajuć jaho dla dohladu za skuraj tvaru i cieła, bo jano vałodaje cudoŭnymi ŭvilhatnialnymi jakaściami. Kakosavaje masła ŭtrymlivaje lohki SPF-filtr, tamu abaraniaje ad soniečnych promniaŭ i spryjaje pryhožamu zaharu. I ŭ dadatak, masła možna vykarystoŭvać jak alternatyvu srodkam dla źniaćcia makijažu.
Šy
Masła šy albo karyte vielmi lubić dalikatnaja žanočaja skura vakoł vačej. A ŭvohule, hetaje masła ratuje ad usiaho na śviecie: paskaraje hajeńnie ran i treščyn, amałodžvaje i źmianšaje marščyny, spryjaje rehienieracyi, uvilhatniaje, zdymaje napružanaść, abaraniaje ad ultrafijaletu, źmiakčaje i supakojvaje skuru, papiaredžvaje raściažki, zdymaje acioki, adnaŭlaje i siłkuje vałasy.
Palmavaje
Utrymlivaje maksimalnuju kolkaść vitaminaŭ A, Je, pamahaje dać rady łomkaści paznohciaŭ, palapšaje koler tvaru. Kali nanieści palmavaje masła na vałasy za hadzinu da myćcia, jany stanuć bolš bliskučymi i buduć lepš rasčesvacca.
Kakavy
Pra cudoŭnyja jakaści masła kakavy viadoma vielmi daŭno. Kaliści baćki dadavali kavałačak sapraŭdnaha masła kakavy ŭ haračaje małako, kab padlačyć dziciaci horła. Taki smačny kaktejl uvilhatniaŭ ślizistuju i spryjaŭ bolš lohkamu adcharkvańniu makroty. Kaśmietyčnaje masła kakavy taksama, jak i charčovaje, moža prynieści šmat karyści. Jano źmiakčaje mazali, zvodzić šramy, rubcy i plamy paśla pryščoŭ, jaho možna nanosić na vusny, kab abaranić ich i viarnuć im miakkaść.
Maski z masłam kakavy dapamahajuć pazbavicca ad miaškoŭ pad vačami i aciočnaściu. Žančynam varta ŭziać na ŭzbrajeńnie i jašče adnu cudoŭnuju jaho jakaść: rehularnaje ŭcirańnie masła ŭ skuru hrudziej robić ich bolš pruhkimi. Kali ž vykarystoŭvać masła kakavy pry abhortvańni, možna zaŭvažna palepšyć stan celulitnaj skury.
Manha
Prosta niezamiennaje, kali ŭ kutočkach vusnaŭ ci na samich vusnach źjavilisia treščynki. Kali karystacca hetym masłam uvieś čas, možna pazbavicca ad śladoŭ roznych utvareńniaŭ na tvary, šramaŭ, zapavolić źjaŭleńnie marščyn. Akramia taho, masła manha źmianšaje pačyrvanieńnie, zapaleńnie skury, spryjaje rehienieracyi i zaciahvańniu ran. Jano dapamahaje źniać śvierb paśla ŭkusaŭ nasiakomych i pieramahčy alerhičnyja vysypańni.
Ałoe Viera
Hetaje masła moža adnavić bałans skury paśla abmaražeńnia, abvietryvańnia ci apioku. Jano cudoŭna zaciahvaje ranki ci jazvački. Mienavita masła ałoe viera efiektyŭnaje, kali treba pieramahčy vuhry ci inšyja prablemy sa skuraj. Jano hetak ža, jak i masła manha, dapamahaje pazbavicca ad śvierbu paśla ŭkusaŭ nasiakomych i alerhičnych vysypańniaŭ.
Treba dadać, što masły možna spałučać pamiž saboj, dla roznych častak cieła vykarystoŭvać svaje, dadavać ich u inšyja kaśmietyčnyja srodki, rabić ź imi maski. Sprabujcie, i vy abaviazkova znojdziecie dla siabie idealny varyjant.
TAA «Miedykałfort hrup», UNP 192622953
Ciapier čytajuć
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary