Nastaŭnica z Salihorska: Chaj dzieci na zaniatkach karystajucca mabilnikami

Na pieršaj niefarmalnaj kanfierencyi dla nastaŭnikaŭ «EdCamp Belarus» vialiki rezanans mieŭ vystup vykładčycy anhlijskaj movy ŭ salihorskaj SŠ № 4: «Vykarystańnie mabilnych telefonaŭ na zaniatkach». Tema hetaja ŭ Biełarusi słaba daśledavana, i niekatoryja supracoŭniki škoł pryncypova zabaraniajuć dzieciam załazić u hadžety na svaich pradmietach.

Pavialičyć

My patelefanavali Vieranicy Biebiech, jakaja vykładaje jak u pačatkovych, tak i ŭ starejšych kłasach, kab raspytać, jakim čynam treba naładzić navučańnie, dzie mabilniki buduć tolki na karyść.

«Ja daŭno imknułasia da taho, kab pačać ukaraniać sučasnyja technałohii ŭ praces navučańnia: tak dzieciam cikaviej vučycca, jany stanoviacca kudy bolš matyvavanymi ŭ hetym pracesie. Aktyŭna vykarystoŭvać anłajn-płatformy pačała paśla taho, jak pryniała ŭdzieł u amierykanskaj prahramie ŭdaskanaleńnia piedahahičnaha majsterstva nastaŭnikaŭ siarednich škoł.

Ja pracuju z roznymi siervisami, ale asnoŭnyja heta — Kahoot i Socrative. Pieršaja dazvalaje stvarać viktaryny, testy i hulni na lubuju temu, a paśla pravodzić zaniatki ŭ farmacie spabornictvaŭ: dzieci dzielacca na kamandy i zmahajucca za toje, chto pieršym pravilna adkaža na pytańnie.

Dla hulni patrebnyja tolki kampjutar z vychadam u internet ci dva smartfony ŭ kłasie. Dzieć mohuć taksama rabić čelendžy sami z saboj doma, a paśla — dzialicca vynikami ŭ sacsietkach i paraŭnovać svaje viedy ź inšymi. «Socrative» źjaŭlajecca vialikaj bazaj i kanstruktaram testaŭ. Kaniečnie, treba zhubić čas, kab ich stvaryć, ale paśla vy aščadzicie jaho na tym, što nie prychodzicca praviarać sšytki, a taksama pravodzić pracu nad pamyłkami: test praduhledžvaje kamientaryi da pamyłkovych i pravilnych adkazaŭ. Akramia taho, u bazie možna znajści šmat hatovych testaŭ, imi možna svabodna karystacca», — padzialiłasia svaim dośviedam Vieranika.

Jana ličyć, što z takim padychodam navat dvoječniki stanoviacca matyvavanymi i imknucca kankuryravać ź inšymi vučniami. Padtrymlivaje jaje ŭ hetym i kiraŭnictva škoły.

«Mabilniki — heta toj instrumient, jaki nie možna, a treba vykarystoŭvać na zaniatkach. Na anhlijskaj movie jany nam zamianiajuć linhafonny kabiniet, naprykład: z dapamohaj smartfonaŭ my słuchajem zamiežnuju movu i vučym vusnuju havorku.

Ja liču, što telefony i internet — heta jak sakretny pakoj u Chohvartsie: hałoŭnaje, pravilna ŭ ich pytacca.

Kali navučyć dziaciej karystacca infarmacyjaj adtul, telefony zmohuć dadatkova vučyć dziaciej krytyčna myślić», — ličyć nastaŭnica. Mienavita tamu na jaje zaniatkach usie svabodna karystajucca mabilnikami: u nastaŭnicy i dumki niama, što niechta budzie padmanvać jaje i ŭklučać ich nie pa pryznačeńni.

• 0
• 0
• 0
• 0
• 0
• 0
• 0
• 0