Znoŭ seksizm! Internaŭtaŭ aburyła rekłama IKEA pra niezamužnich žančyn
Karystalniki sacsietak nazvali seksisckim rekłamny rolik meblevaj kampanii IKEA, jaki vyjšaŭ niadaŭna na kitajskim telebačańni. Pra miedyjaskandał piša VVS.
«Nie nazyvaj mianie mamaj, kali nie možaš pryvieści dadomu chłopca», — kaža ŭ rekłamie maładoj niezamužniaj kitajancy maci padčas siamiejnaj viačery. Dalej na parozie kvatery źjaŭlajecca małady čałaviek z bukietam, a baćki dziaŭčyny radasna pačynajuć upryhožvać haścinuju pry dapamozie elemientaŭ dekoru ad IKEA.
Rekłama vyklikała vielmi niehatyŭnuju reakcyju ŭ sacsietkach, jaje nazvali seksisckaj i škodnaj. Karystalniki adznačali, što ŭ roliku vyśmiejvajucca adzinokija žančyny, a taksama abiasceńvajecca asoba žančyny tolki tamu, što ŭ jaje niama bojfrenda. Paśla hetaha meblevaja kampanija vymušanaja była paprasić prabačeńnia pierad aŭdytoryjaj i paviedamić, što prybiare dadzieny rolik z efiru.
U zajavie skazana, što kampanija prynosić svaje prabačeńni za toje, što «stvaryła niapravilny vobraz». «Hetaja rekłama pavinna była pakazać, jak lohka tavary z IKEA dapamahajuć pieratvaryć zvyčajnaje žyllo ŭ miesca dla śviata. My chacieli zaklikać našych pakupnikoŭ adznačać luby momant žyćcia», — havorycca ŭ paście. Akramia taho, u svajoj zajavie kampanija padkreślivaje, što padtrymlivaje luby styl žyćcia i što raŭnapraŭje połaŭ — adna z klučavych kaštoŭnaściaŭ karparatyŭnaj kultury IKEA.
U apošni čas u Kitai dastatkova surjozna abmiarkoŭvajecca prablema dziaŭčat starejšych za 27 hadoŭ, jakija nie znachodziacca ŭ adnosinach. Na takich dziaŭčat u hramadstvie akazvajecca cisk, ich nazyvajuć sheng nu, to bok «niezapatrabavanymi» abo «abjedkami». Siužet padobnaha cisku i loh u asnovu novaj rekłamy IKEA, adnak jaje stvaralniki nie pryniali pad uvahu, što vykarystoŭvajuć dla pryciahnieńnia ŭvahi vielmi niehatyŭnaje kliše.
U adnym z hnieŭnych kamientaroŭ u kitajskaj sacyjalnaj sietcy Weibo havorycca: «Dyskryminacyja adzinočak i adzinokich žančyn. Niama bojfrenda — i tvaja ŭłasnaja siamja pahardžaje taboj. Što za kaštoŭnaści vy raspaŭsiudžvajecie?» Inšy kamientatar praciahvaje: «Jak mižnarodnaja kampanija IKEA pavinna tranślavać samyja prahresiŭnyja idei, jakija isnujuć u śviecie, i nieści ich u Kitaj. Zamiest hetaha jana pierajmaje ŭ Kitai drennaje i tranśluje heta na ŭvieś śviet».
Kamientary