U Rasii siońnia ŭstupiŭ u siłu zakon, jaki abaviazvaje ŭładalnikaŭ VPN-servisaŭ i tak zvanych ananimajzieraŭ začyniać dostup da zabaronienych sajtaŭ — paviedamlaje BBC. Zakon, padpisany Pucinym u lipieni, pavodle zadumy stvaralnikaŭ pavinien zakranuć usie viadomyja instrumienty abychodu błakavańniaŭ i dasiahnieńni ananimnaści ŭ internecie, u tym liku ananimny braŭzer Tor.
«U Rasii jość 25-30 proksi- i VPN-servisaŭ, papularnych u nasielnictva. Siarod ich — cameleo.ru, 2ip.ru i inšyja. Jany ŭsie vykazali hatoŭnaść vykonvać zakon», — skazaŭ vydańniu RBK kiraŭnik Roskomnahladu Alaksandr Žaraŭ.
Pry hetym jon pryznaŭ, što jość jašče sotni tysiač drobnych VPN-servisaŭ, błakavać jakija značna składaniej. «Ale zakon aryjentavany ŭ pieršuju čarhu na najbolš papularnyja ŭ hramadzian servisy», — adznačyŭ Žaraŭ.
Pravaabarončaja arhanizacyja Amnesty International paśla padpisańnia zakona zajaviła, što papraŭki stali «surjoznym udaram pa internet-svabodzie» u Rasii.
Chto budzie Cerbieram?
Sačyć za vykanańniem zabarony budzie fiederalnaja dziaržaŭnaja infarmacyjnaja sistema (FHIS). Pa zapycie palicyi Roskomnahlad budzie vyznačać pravajderaŭ, jakija pradastaŭlajuć dostup da VPN-servisam i ananimajzeraŭ.
Ad pravajderaŭ zapatrabujuć padłučycca da FHIS i padać dadzienyja ab uładalniku ananimajzeru, jaki taksama budzie pavinien padłučycca da sistemy. Paśla hetaha ad uładalnika servisu zapatrabujuć začynić dostup da sajtaŭ, zaniesienych u śpis zabaronienych. Kali ŭładalnik admovicca - ananimajzery zabłakujuć.
U papraŭki ŭklučany taksama abmiežavańni dla pošukavikaŭ. Kali servisy buduć pakazvać spasyłki na sajty z rejestra zabaronienych, ich buduć štrafavać. U testavańni, pa infarmacyi rehulatara, udzielničali «Łabaratoryja Kaśpierskaha», Mail.Ru i Jandeks.
Taksama ŭdzielničać u testavańni hatovyja Rambler, «Sputnik» i ananimajzery 2ip.ru i 2ip.io, paviedamlała viedamstva.
Ci realna zabłakavać Tor?
Całkam začynić dostup da Tor u Roskomnahladu nie atrymajecca. Hety braŭzer vykarystoŭvaje nie tolki adkrytyja sietkavyja adrasy, ale i zakrytyja, jakija zabłakavać amal niemahčyma. Ich Tor vydaje pa zapycie karystalnika.
U Biełarusi ŭžo sprabavali zabłakavać Tor. Pa stanie na śniežań 2016 hoda cenzary dadali ŭ čorny śpis kala 6 tys. z 7 tys. publičnych adrasoŭ Tor, jakija dziejničajuć pa ŭsim śviecie.
Heta pryviało da taho, što kolkaść karystalnikaŭ niepubličnych sietkavych adrasoŭ paśla pačatku błakavańnia vyrasła z 250 čałaviek da 3 tysiač čałaviek, paviedamlała «Jeŭrapiejskaje radyjo dla Biełarusi». U toj ža čas kolkaść karystalnikaŭ publičnych adrasoŭ źniziłasia niaznačna — z 3 tysiač da 2,6 tysiač čałaviek.
Ciapier čytajuć
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram13
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2020
Kamientary