Były kandydat na pasadu prezidenta i palitviazień Alaksandr Kazulin prajaŭlaje palityčnuju aktyŭnaść. U subotu jon maje namier naviedać pasiedžańnie Minskaj abłasnoj arhanizacyi BSDP «Hramada». Mahčyma, jon zachoča bałatavacca ŭ kiraŭniki partyi na vybarach, jakija adbuducca nie paźniej za sakavik 2018 hoda
Alaksandru Kazulinu 62 hady. U 1996—2003 jon byŭ rektaram BDU i adnym z najbolš prybližanych da Łukašenki čynoŭnikaŭ. Jaho jašče nazyvali «ministram biez partfiela». U 2006 hodzie Kazulin byŭ adnym z apazicyjnych kandydataŭ na prezidenckich vybarach.
25 sakavika 2006 hoda palityk pavioŭ ludziej na Akreścina, kab vyzvalać aryštavanych. U vyniku jon byŭ asudžany da 5,5 hoda «za złosnaje chulihanstva» i «arhanizacyju masavych biesparadkaŭ».
Padčas źniavoleńnia palityka pamierła jaho žonka Iryna. Na volu Kazulin vyjšaŭ u žniŭni 2008 hoda, adnak adrazu adyšoŭ ad aktyŭnaj palityčnaj dziejnaści.
U 2005-2008 Kazulin ličyŭsia kiraŭnikom Biełaruskaj sacyjał-demakratyčnaj partyi «Hramada», a paśla razam z Alaksiejem Karalom i Uładzimiram Niściukom vyjšaŭ z BSDP.
Cikavy fakt, što ŭ žniŭni 2008 hoda Kazulina abrali hanarovym staršynioj partyi. Mnohija jahonyja adnapartyjcy ličać, što takaja rehalija dajecca pažyćciova, tamu Kazulin nibyta maje prava prymać udzieł u partyjnym žyćci BSDP.
Tym nie mienš, historyk i siabra BSDP «Hramada» Anatol Sidarevič kaža, što takoj pasady niama ŭ statucie partyi.
Nie paźniej za 11 sakavika 2018 hoda pavinien adbycca źjezd sacyjał-demakrataŭ, dzie budzie abrany novy staršynia. Sprava ŭ tym, što Iryna Vieštard bolš nie maje prava bałatavacca na hetuju pasadu, bo adbyła try terminy.
Pradprymalnik z Uzdy, siabra BSDP Viktar Kryval siarod tych, chto aktyŭna kamunikuje z Kazulinym. Jon paćvierdziŭ, što Kazulin sapraŭdy maje namier być na Minskim abłasnym schodzie partyi.
«Pa maich nazirańniach, Kazulin adnaviŭsia całkam», — skazaŭ «NN» Kryval. Jon nie vyklučaje, što Kazulin zachoča bałatavacca ŭ staršyni, ale dla hetaha jamu treba znoŭ ustupić u partyju. Zrešty, Viktar Kryval sam maje žadańnie stać novym staršynioj partyi. «Minuły raz ja atrymaŭ nul hałasoŭ. Na hety raz ja stanu staršynioj», — zapeŭnivaje Kryval.
Telefon samoha Alaksandra Kazulina adklučany ŭžo niekalki dzion.
Ciapier čytajuć
Cciapan Łatypaŭ treci raz sprabavaŭ ździejśnić suicyd u turmie4
Cciapan Łatypaŭ treci raz sprabavaŭ ździejśnić suicyd u turmie
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1313
Kamientary