U Breście chłopiec napisaŭ farbaj pad voknami vinšavańnie «Pušyściku». Žychary źviarnulisia ŭ milicyju
«Z dniom naradžeńnia Pušyścik», — taki nadpis pad padjezdam doma ŭ adnym ź mikrarajonaŭ horada pakinuŭ nieviadomy małady čałaviek. Žychary kreatyŭ nie acanili i napisali zajavu ŭ milicyju.
Momant naniasieńnia vinšavańnia na chodniki trapiŭ na kamieru videanazirańnia, pastaŭlenuju na domie. Incydent adbyŭsia ŭ noč na 16 listapada. Na zapisie vidać, jak da padjezda padychodzić mužčyna i na tratuary vyvodzić vinšavańnie svajmu «pušyściku». Chłopiec śpiašaŭsia tak, što prapuściŭ litaru «i» ŭ słovie «roždienija».
Žycharam doma takaja tvorčaść pad voknami pryjšłasia nie daspadoby, i jany napisali zajavu ŭ milicyju z patrabavańniem pryciahnuć vinavataha da adkaznaści, paviedamiŭ TUT.BY aficyjny pradstaŭnik UUS Bresckaha abłvykankama Illa Pomin.
Jak paviedamili žychary doma, «pušyścika» ŭsio ž znajšli. Asobu vyśvietlili pa dacie naradžeńnia. Akazałasia, što 16 listapada dni naradžeńnia ŭ ich domie śviatkujuć dva čałavieki: chłopiec i dziaŭčyna. Pieršy vypaŭ z-pad padazreńnia, a druhaja identyfikavać asobu złamyśnika pa zapisie kamiery videanazirańnia nie zmahła. Akramia taho, jana paviedamiła, što muž jaje adbyvaje pakarańnie ŭ miescach pazbaŭleńnia voli, a tajnaha prychilnika ŭ jaje niama.
Pravierka zajšła ŭ tupik. Vyličyć parušalnika nie ŭdałosia. U adkazie, jaki žychary atrymali ź milicyi, paviedamlałasia, što ŭ dziejańniach nieviadomaha jość skład administracyjnaha pravaparušeńnia «drobnaje chulihanstva». U toj ža samy čas asobu, jakaja ŭčyniła pravaparušeńnie, u terminy, ustanoŭlenyja PVKaAP, nie ŭdałosia vyličyć. Takim čynam, było pryniata rašeńnie spynić administracyjnuju spravu.
Kamientary