Ułady RF nie buduć pieraškadžać adpraŭcy rasijskich spartoŭcaŭ na Alimpijadu 2018 hoda ŭ Pchiončchanie ŭ niejtralnym statusie, zajaviŭ prezident RF Uładzimir Pucin, paviedamlaje Intierfaks.
«My, biez usiakaha sumnievu, nie budziem abjaŭlać nijakaj błakady, nie budziem pieraškadžać našym alimpijcam prymać udzieł (u Hulniach), kali chto-niebudź ź ich zachoča pryniać udzieł u asabistaj jakaści», — skazaŭ kiraŭnik Rasii padčas razmovy z rabočymi Horkaŭskaha aŭtazavoda.
Napiaredadni vykankam Mižnarodnaha alimpijskaha kamiteta (MAK) pryniaŭ rašeńnie časova prypynić siabroŭstva Alimpijskaha kamiteta Rasii (AKR), a na zimovaj Alimpijadzie 2018 hoda ŭ Pchiončchanie zmohuć vystupić tolki «čystyja» rasijskija spartoŭcy pad niejtralnym ściaham. H.zn. tyja, kaho asobna dapuścić MAK.
«Kančatkovaje rašeńnie, viadoma, pavinien pryniać alimpijski schod», — zajaviŭ prezident RF, nahadaŭšy, što jon adbudziecca na dniach, heta značyć 12 śniežnia.
Uładzimir Pucin zajaviŭ, što Rasija sama dała padstavu dla rašeńnia MAK pa alimpijskaj zbornaj, ale hetaju padstavaj, pavodle jahonych słovaŭ, nie zusim sumlenna skarystalisia.
«Pa-pieršaje, treba prosta skazać, što my zbolšaha sami ŭ hetym vinavatyja, tamu što dali nahodu dla hetaha. A pa-druhoje, liču, što hetaj padstavaj skarystalisia nie zusim sumlennym čynam, miakka kažučy», — skazaŭ Pucin.
Kamientary