Viktar Marcinovič: Čaćviorty Pucin-prezident zajaŭleny mściŭcam

Z Novym Vovam!

Pakul my ŭ Biełarusi abmiarkoŭvali sapraŭdy važnyja rečy, naprykład, fotazdymak Hanny Bond sa śvinoj hałavoj, u susiedniaj Rasii adbyłasia adna nieprykmietnaja drabiaza. Uładzimir Pucin paćvierdziŭ svoj udzieł u nastupnych prezidenckich vybarach. Źniaŭšy chaj sabie i kvołuju, ale intryhu nakont taho, budzie jon vyłučacca sam albo pastavić pa prykole pakiravać impieryjaj kaho sa znajomych.

Vyłučeńnie Pucina absalutna roŭnaje jahonaj pieramozie: Sabčak z Navalnym harantujuć, što kampanija budzie nie sumnaj, ale nie pieršaja, ni druhi prezidentam nie stanuć, jak by ni lutavała chipstota na vuličnych mitynhach za mietaładetektarami.

I voś u hetym, čaćviortym užo dla Pucina, vyłučeńni šmat było cikavostak, pa jakich možna ŭskosna zrazumieć, što za kadencyja napieradzie ŭ našaj mahutnaj susiedki. Samo zaciahnutaje čakańnie — pojdzie, nie pojdzie — dało šmat trafiku jućjubnym kanśpirołaham, jakija zapeŭnivali, što Uładzimir Uładzimiravič imkniecca zabłytać «suśvietnuju zakulisu» (voś jość słovy, jakim navat nie chočacca šukać adpaviednik u biełaruskaj movie). Maŭlaŭ, jon ciahnie, kab pieraškodzić Biełamu domu vybudavać stratehiju supraćdziejańnia pucinskaj pieramozie, i ciahnuć jon budzie nu zusim da apošniaj miažy, paśla jakoj užo jurydyčna niemahčyma vysunucca.

Inšyja kazali: Pucin paluje na dobruju nahodu. Pucin pilnuje naviny pra padrastańnie cenaŭ na naftu, dobrych viestak ź Siryi, niejkaj inšaj bujnoj pieramohi, na fonie jakoj možna było b z vyhodaj pajści ŭ prezidenty. I nahoda sapraŭdy zdaryłasia: uvieś minuły tydzień śviet abmiarkoŭvaŭ dopinhavy skandał, skasavańnie miedaloŭ i hučnaje adłučeńnie Rasii ad Alimpijady. I voś mienavita na hetym fonie prahučała rašeńnie vyłučycca. Rasijskaja libieralnaja presa śmiešna napisała, što takim čynam Pucin pasprabavaŭ «padsaładzić horyč» ad rašeńnia MAK. Kalehi nie zadalisia pytańniem: što dla Pucina važniejšaje? Niejkaja tam Alimpijada ź miedalami ci asabisty palityčny los? I kali ŭsie razumiejuć, što nie prezident dla Alimpijady, a Alimpijada dla prezidenta, tady ŭsio naadvarot. Pucin nie imknuŭsia «padsaładzić horyč». Jon skarystaŭ horyč, kab kansalidavać elektarat i zdabyć praz toje słodyč dla siabie. Vykavaŭsia hetki Pucin kryŭdy.

Rašeńnie MAK było ahučanaje 4 śniežnia, vyłučeńnie adbyłosia 6-ha. Źbiantežanaj Rasii pakazali: kali jaje beściać, pobač jość toj, chto nie spuścić złaśliŭcam. Čaćviorty Pucin-prezident zajaŭleny Pucinym-mściŭcam.

Hetaksama jak pieršaha Pucina abirali dziela taho, kab spynić teraryzm i niespakoj u Čačni (vojny ŭ Čačni sapraŭdy skončylisia, ale, na žal, paśla byli jašče Hruzija i Ukraina, pryčym za pieršaje adkazny Miadźviedzieŭ), hetaksama jak druhi Pucin «navodziŭ paradak» i adbudoŭvaŭ viertykal, čaćviorty zojmiecca vorahami. Hety Pucin mianie niepakoić bolš za ŭsio, bo jahony hnieŭ z samaha pačatku, ad vyłučeńnia, skiravany vonki.

I dobra było b, kali b na druhim polusie ad Pucina siadzieła ŭraŭnavažanaja i vieličnaja Chiłary. Ale supiernikam i procivahaj Uładzimiru Uładzimiraviču ŭ najbližejšyja hady budzie takaja cikavaja i ruchlivaja asoba, jak Donald Tramp. I dziakuj Bohu, jahonaja ŭvaha ciapier skiravanaja na Paŭnočnuju Kareju!

Bo kali raptam jany pačnuć dužacca — voś hety Tramp, jaki adradžaje «vialikuju Amieryku», i hety čaćviorty Pucin, jaki vyłučajecca z choram pakryŭdžanych alimpijcaŭ na bekstejdžy, — usiamu hłobusu zrobicca ciopleńka.

Vy zaŭvažyli, jak było azdoblena vyłučeńnie? Roŭna ŭ toj ža dzień, 6 śniežnia, za niekalki hadzin da abjavy, Pucin udzielničaŭ u forumie «Dabravolec Rasii». I tam, vyhladaje, viedajučy pra padrychtavanaje vyłučeńnie, uračystaj intanacyjaj, staranna padkreślivajučy kožnaje słova, viadučy zapytaŭsia: «Vy! Budziecie! Prymać! Udzieł u vybarach 2018-ha hoda?!». Sa scenarnaha punktu hledžańnia adkazać tut možna było tolki «Tak!» ci «Nie, Dzima pojdzie». Adnak Pucin zavahaŭsia i abiacaŭ, što adkaz budzie ŭ najbližejšy čas (hladzi tut, na 7-j chvilinie). Vyłučeńnie jak takoje adbyłosia na 85-hodździ aŭtazavoda «HAZ», dzie ŭ jaho ŭžo nie prosta pytalisia, a mienavita prasili vyłučycca. Prahučała farmuloŭka «zrabicie ž nam padarunak». I Pucin pahadziŭsia. Pajšoŭ nasustrač pracoŭnym.

Heta zusim nie toje samaje, što adbyłosia, kali ŭ 1999-m jon vyłučyŭsia, atrymlivajučy mantyju hanarovaha siabra navukovaha savieta Pieciarburhskaha ŭniviersiteta. Zusim inšaje vyłučeńnie było i ŭ 2011-m, kali ŭ Łužnikach sabraŭsia źjezd «Adzinaj Rasii». U pieršym vypadku Pucin zajaŭlaŭ siabie jak vučony, u druhim — jak namienkłaturščyk. Tut ža idzie razmova pra «ajca narodaŭ», «novaha Stalina», «Dzieda Maroza», jakoha kličuć usioj krainaj. I jon jašče dumaje, prychodzić na hety ranišnik ci vyjści lepiej na inšym, tam, dzie «HAZ» — za vas».

Styl vyłučeńnia vytłumačalny: Pucin ciapier, kaniečnie, vielmi papularny (hł. varjacki vidos). Rasija paśla raspadu SSSR jašče nikoli nie mieła nastolki tryvała papularnych lideraŭ. 83 adsotki — z takoj padtrymkaj možna zrabić šmat.

I narabić taksama.

Papularnaść vybiahaje z taho, što Pucinu ŭdałosia za 17 hadoŭ vyčasać krainu na svoj kapył, vyraścić ułasnaha navat nie vybarščyka, ale — hramadzianina. Kožny z nas tak ci inakš adčuŭ heta ŭ svaim siabroŭskim kole: toje, jak źmianilisia našy rasijskija znajomcy i rodzičy za Pucinym. Jak transfarmavalisia temy, jakija im cikavyja. Jak inšymi stali krynicy honaru i złości. Jak lohka ich stała pakryŭdzić. Jak składana razmaŭlać pra Ukrainu i navat pra Biełaruś. I ja nie viedaju, kudy padzieniecca raźjušanaść hetych ludziej na Zachad, jak sydzie i ci sydzie mirnym šlacham varožaść da «pindosaŭ». Vyłučeńnie Pucina — heta ŭmacavańnie kožnaha ź ich va ŭłasnych pohladach i [pałamanaj] karcinie śvietu.

Čaćviorty prezidencki termin Pucina moža chavać u sabie šmat siurpryzaŭ dla nas, biełarusaŭ. Da treciaj kadencyi my i dapuścić nie mahli, što la našaj miažy paŭstanuć DNR i ŁNR, Krym budzie adsiečany ad Ukrainy, a Minsk zrobicca placoŭkaj dla mirnych pieramovaŭ, bakami ŭ jakich vystupiać niekali «braterskija» «słavianskija» krainy.

To, pakul «kalektyŭny ruski» prosić Pucina zrabić jamu padarunak vyłučeńniem — mnie, ad imia «kalektyŭnaha susieda», chočacca paprasić Pucina bolej nikoha nie «ratavać» za miežami Rasii. Bo adziny sposab pieramahčy złość — ni na kaho tryvały čas nie złavacca.

• 0
• 0
• 0
• 0
• 0
• 0
• 0
• 0