Jakija praviły treba vykonvać, kab nie zamierznuć

Z ustanaŭleńniem maroznaha nadvorja štodzień u miedycynskija ŭstanovy pa ŭsioj krainie źviartajecca kala 30 čałaviek z chaładovymi traŭmami i kala 300 — z hałalodnymi.

U stalicy ŭ apiokavaje adździaleńnie Haradskoj kliničnaj balnicy chutkaj miedycynskaj dapamohi (BCHMD) było špitalizavana z pačatku ŭstanaŭleńnia takich nizkich tempieratur usiaho čatyry čałavieki.

— Dla Minska heta nievialikija ličby, — kamientuje zahadčyk apiokavaha adździaleńnia BCHMD Dźmitryj Mazaleŭski. — U asnoŭnym chaładovyja traŭmy atrymlivajuć asacyjalnyja asoby, jakija złoŭžyvajuć ałkaholem. Hetym razam paciarpiełyja źviarnulisia svoječasova, tamu im nie spatrebilisia apieracyi i amputacyja.

Ale časam zdarajecca i pa-inšamu. Miedyk uspaminaje, jak niekalki hadoŭ tamu mužčyna kataŭsia na łyžach za horadam, mocna zamierz, pakul dabiraŭsia da elektryčki. A doma pryniaŭ haračuju vannu, vybracca ź jakoj samastojna ŭžo nie zmoh. U vyniku pryjšłosia amputavać halonku i kiści ruk, mužčyna staŭ invalidam pieršaj hrupy. Tamu pieršuju dapamohu z chaładovymi traŭmami važna akazvać pravilna. Tut treba pamiatać niekalki momantaŭ.

Pakolki takija nizkija tempieratury tojać niebiaśpieku dla našaha žyćcia, najpierš pažadana źvieści da minimumu znachodžańnie na adkrytym pavietry. Kali pracujecie na vulicy, važna zachodzić u ciopłaje pamiaškańnie i zastavacca tam da poŭnaha sahravańnia. Apranacca treba ŭ niekalki słajoŭ. Dastatkovuju ciepłaizalacyju stvorać try słai. Praŭda, kali vy ciopła apranutyja, fizičnuju aktyŭnaść pry hetym treba źmienšyć, bo ŭ vilhotnym ad potu adzieńni ryzyka atrymać chaładovuju traŭmu pavialičvajecca. 80—90 % pieraachaładžeńniaŭ atrymlivajuć ludzi ŭ stanie ałkaholnaha apjanieńnia: pieryfieryčnyja sasudy ad jaho rasšyrajucca i karotkačasovy efiekt sahravańnia abaročvajecca chutkaj strataj ciełam ciapła. Tamu ad ałkaholu lepš admovicca. Kiroŭcy aŭtamabilaŭ, asabliva kali płanujuć jechać na dalokija adlehłaści, pavinny zaŭsiody mieć na ŭvazie, što ŭ marazy aŭto moža złamacca. Tamu važna zapaścisia ciopłym adzieńniem, zaradžanym mabilnym telefonam i praduhledzieć sposaby ŭłasnaj evakuacyi, a kali aŭtamabil spyniŭsia na trasie, źviartacca da znajomych ci ŭ ekstrannyja słužby.

Pieramiaściŭšysia ŭ ciopłaje pamiaškańnie, važna pamiatać, što nielha padstaŭlać ruki pad haračuju vadu ci stavić stupni na batareju, bo mienavita praz takija situacyi zamierzłyja tkanki i hinuć. Adahravacca treba pastupova. Zamierzłyja kaniečnaści treba zachutać ciopłym adzieńniem, vypić ciopłaje (nie haračaje!) pitvo. Kali paciarpieły nie adčuvaje palohki, treba źviartacca pa miedycynskuju dapamohu. Svoječasovy vizit u miedycynskuju ŭstanovu zmoža vyratavać kaniečnaści ad amputacyi.

• 0
• 0
• 0
• 0
• 0
• 0
• 0
• 0