Paleantołahi znajšli pareštki ptušaniaci adnoj ź pieršych ptušak na Ziamli
Paleantołahi ŭpieršyniu znajšli reštki cieła i pioraŭ novanarodžanaha ptušaniaci, jakoje žyło na Ziamli 127 miljonaŭ hadoŭ tamu. Heta dapamahło im raskryć niekatoryja tajamnicy evalucyi ptušak, havorycca ŭ artykule, apublikavanym u časopisie Nature Communications.
Siońnia siarod paleantołahaŭ niama zhody ŭ tym, jak i čamu prodki ptušak abzavialisia pierjem i kryłami. Častka navukoŭcaŭ prytrymlivajecca kłasičnaj teoryi pra toje, što pierje dazvoliła ptuškam zaniać novuju ekałahičnuju nišu, niedastupnuju dla dynazaŭraŭ, — pavietranuju prastoru. Inšyja ž ličać, što pierje źjaviłasia nie dla palotaŭ, a dla abahrevu cieła abo pryciahnieńnia ŭvahi samak. Jašče bolš roznahałośsiaŭ vyklikaje samo pytańnie ab tym, kali ptuški navučylisia lotać.
Vyjaviŭšy zakamianiełaść ptušaniaci, što pamierła adrazu paśla naradžeńnia, navukoŭcy praskanavali jaje pry dapamozie kampjutarnych tamohrafaŭ i krynicy sinchronnaha vypramieńvańnia, što dazvoliła im praanalizavać unutranuju strukturu kostak i adnavić «trochmiernaje» abličča ptuški.
Jana akazałasia vielmi minijaturnym stvareńniem: daŭžynia jaje cieła składała ŭsiaho piać santymietraŭ, a masa — nie bolš za 85 hramaŭ. Miarkujučy pa struktury škileta, hetaje ptušania było takim ža biezdapamožnym, jak i tolki što narodžanyja vierabji, papuhai, ziaziuli abo čapli.
Hety fakt, jak adznačajuć navukoŭcy, pakul nie dazvalaje kazać pra toje, što ŭsie staražytnyja piarnatyja raźvivalisia padobnym čynam. Całkam mahčyma, što 127 miljonaŭ hadoŭ tamu isnavali i ptuški, padobnyja husakam, kuram, čyje ptušaniaty naradžajucca viduščymi i ŭmiejuć chutka biehać ci navat lotać praktyčna adrazu paśla naradžeńnia. Adkryćcio inšych unikalnych pareštkaŭ moža dać adkaz na hetaje pytańnie.
Kamientary