Historyju pra stvareńnie BNR viedać treba, ale hanarycca tymi padziejami nie varta. Pra heta Alaksandr Łukašenka zajaviŭ siońnia ŭ čas sustrečy z tvorčaj moładździu, paviedamlaje BiełTA.
Łukašenka zajaviŭ, što tyja padziei da hetaha času mała vyvučany, a isnujučaja infarmacyja vielmi supiarečlivaja. Z adnaho boku, stvaralniki BNR chacieli niezaležnaści dla krainy, z druhoha — jany byli hatovyja prasić u hetaj spravie dapamohi ŭ kaho zaŭhodna, adnak potym znoŭ by apynulisia pad botam.
«U historyi luboj dziaržavy byli roznyja padziei. Voźmiem Hiermaniju: u ich była strašnaja padzieja, jakuju buduć pamiatać usie pakaleńni, — adtul pryjšła vajna. Jany źniščyli miljony ni ŭ čym nie vinavatych ludziej. Heta chałakost nie tolki dla jaŭrejaŭ, ale i dla usiaho śvietu, asabliva dla našaha słavianskaha»,
— skazaŭ Alaksandr Łukašenka.
Kiraŭnik dziaržavy adznačyŭ, što prajšoŭ čas i ŭ Hiermanii ŭžo nie hanaracca hetym pieryjadam u žyćci krainy.
«Jany ž nie hanaracca, što ŭ časy Hitlera byli pabudavanyja šykoŭnyja aŭtabany, što jany tam stvaryli mahutnuju ekanomiku, našych ludziej, ukraincaŭ, ruskich, palakaŭ zhaniali tudy, i jany tam ni za što pracavali, pakul mahli pierasoŭvacca», — kanstatavaŭ Łukašenka. I ŭ biełaruskaj historyi, napeŭna, byli peŭnyja pamyłki, adznačyŭ jon.
Na dumku kiraŭnika dziaržavy, rašeńnie stvaralnikaŭ BNR prasić dapamohi ŭ Niamieččyny nie mahło ŭ poŭnaj miery zabiaśpiečyć niezaležnaść Biełarusi.
«Ad adnaho bota z Uschodu pabiehli na Zachad pad boty kajziera. Možna heta i tak rasceńvać. Ale ja prasiŭ by nie sudzić ich stroha, tamu što nas tam nie było i my heta nie pieražyvali psichałahična, nie razumiejem, što tady adbyvałasia. Haračaje žadańnie zrabić Biełaruś niezaležnaj ich mahło šturchnuć choć da kajziera, choć čort viedaje da kaho. Byli i takija ludzi. Dobraja heta staronka ŭ našaj historyi? Napeŭna, nie zusim», — ličyć Alaksandr Łukašenka.
Kamientary