Praparščyka ź Piečaŭ, jaki katavaŭ sałdataŭ elektrašokieram, pakarali 5 hadami źniavoleńnia
30 sakavika ŭ sudzie Barysava i Barysaŭskaha rajona abvieščany prysud praparščyku Iharu Chiščanku z 72-ha vučebnaha centru ŭ Piečach, paviedamlaje Radyjo Svaboda.
Jaho pryznali vinavatym u słužbovych złoŭžyvańniach, ździeku z sałdataŭ, atrymańni chabaru dy inšych złačynstvach. Ihar Chiščanka asudžany na 5 hadoŭ kałonii ŭzmocnienaha režymu z kanfiskacyjaj majomaści i pazbaŭleńniem zvańnia praparščyka.
Praces nad Iharam Chiščankam prachodziŭ z pačatku sakavika, sud vysłuchaŭ, u tym liku praź videasuviaź, 18 paciarpiełych i 17 śviedak, vyvučyŭ 15 tamoŭ kryminalnaj spravy.
Pavodle śledstva, praparščyk Ihar Chiščanka ŭžyvaŭ da vajskoŭcaŭ, jakija prachodzili navučańnie ŭ 72-m vučebnym centry, elektrašokier, karaŭ ich za niaznačnyja parušeńni dyscypliny ŭdarami pa hałavie, biŭ pa ciele ŭkazkaj i skrutkami z haziet, prymušaŭ kuplać jamu ŭ kramie pradukty i cyharety, abražaŭ słovami dy ździekavaŭsia. U tym liku, pavodle śviedak, praparščyk prymusiŭ šarahoŭca źjeści cybulinu za toje, što toj źjeŭ u sałdackaj stałoŭcy lišni śniadanak.
Zbolšaha svaju vinu Ihar Chiščanka ŭ sudzie pryznaŭ, u tym liku toje, što karaŭ niedazvolenymi mietadami svaich padnačalenych. Jon tłumačyŭ hetyja ŭčynki tym, što nie moh inakš navieści paradak i dyscyplinu. Jak i na śledztvie, praparščyk paprasiŭ u sudzie prabačeńnia ŭ paciarpiełych.
Jak vynikaje z materyjałaŭ spravy, złačynstvy Ihara Chiščanki adbyvalisia ŭ 2016 i 2017 hadach. Pravierka dziejańniaŭ praparščyka pačałasia ŭviesnu 2017 hoda, a jahonaja kryminalnaja sprava była zavieršanaja i pieradadzienaja ŭ sud užo paśla śmierci ŭ 72-m vučebnym centry sałdata Alaksandra Koržyča.
Kamientary