Na Zachadzie vybuchnuŭ sieryjał pra kachańnie rasijskaha i kanadskaha chakieistaŭ
Ad sieryjała «Śpiakotnaje supiernictva» (Heated Rivalry) nie čakali vialikich pośpiechaŭ. Ale niečakana ścipły kanadski prajekt parvaŭ rejtynhi.
«Śpiakotnaje supiernictva» źniali dla kanadskaha stryminhavaha siervisa Crave. Heta historyja dvuch vydumanych chakieistaŭ NCHŁ, kanadca Šejła Chołandera i rasijanina Illi Razanava. U hulni jany — supierniki, a za miežami chakieja ich źviazvajuć doŭhija ramantyčnyja adnosiny, jakija mužčynam davodzicca chavać.
Pra sieryjał pačali havaryć jašče da premjery dziakujučy fanatam pieršakrynicy — prajekt zasnavany na sieryi knih-biestseleraŭ Game Changers piśmieńnicy Rejčeł Ryd. Praz rozhałas na jaho źviarnuli ŭvahu inšyja stryminhi. U vyniku sieryjał pakazali jašče i ŭ ZŠA, Aŭstralii i inšych krainach. Miarkujučy pa danych pošukavych sistem, hladziać prajekt i biełarusy.
Krytyki ŭ zachapleńni ad «Śpiakotnaha supiernictva». Na ahrehatary recenzij Rotten Tomatoes sieryjał maje zajzdrosnyja 96% uchvaleńnia ad krytykaŭ. Recenzienty ŭ zachodnich miedyja nie škadujuć dobrych słoŭ pra prajekt: nazyvajuć jaho najvialikšym siurpryzam hetaha hoda na TB i kažuć, što ŭ sieryjale jość usio, za što lubiać ramantyčnyja kamiedyi.
U Kanadzie statystyka prahladu sieryjała vyrasła na 400% ź jaho premjery, u inšych krainach «Śpiakotnaje supiernictva» taksama zajmaje vysokija pazicyi na stryminhach.
Hety prajekt zavirusiŭsia i ŭ sacsietkach, asabliva ŭ tyktoku. Karystalniki vykładajuć videa, jak jany hladziać sieryjał, i frahmienty ŭlubionych sieryj. A niekatoryja skardziacca, što da ich krainy samy chajpovy sieryjał śniežnia jašče nie dajšoŭ.
U sieryjale staje jarkich eratyčnych scen — vierahodna, u hetym adna z pryčyn papularnaści prajekta. Asabliva ad hetaha prajekta fanaciejuć žančyny, i krytyki miarkujuć, što ŭ hetym i jość pryčyna šalonaj papularnaści sieryjała. Akramia erotyki, žančyn vabić pryhožaja historyja kachańnia, u jakoj jany bačać sapraŭdnuju ramantyku.
Zachodnija miedyja nie abminuli fienomiena. Vydańnie Hollywood Reporter piša pra toje, što žančyny «šalejuć ad «Śpiakotnaha supiernictva», a Cosmopolitan ličyć, što šou «abudziła niešta va ŭsich nas».
Apošniaja, šostaja sieryja pieršaha siezona vyjšła 26 śniežnia. Ciapier fanatam prajekta treba nabracca ciarplivaści — jašče da finalnaj sieryi «Śpiakotnaje supiernictva» padoŭžyli na druhi siezon.
«Naša Niva» — bastyjon biełaruščyny
PADTRYMAĆCiapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1313
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata13
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 202633
Kamientary