Biełaruś i Jeŭrasajuz za apošnija dva hady dasiahnuli vielmi mnohaha ŭ raźvićci svaich adnosin. Pra heta ministr zamiežnych spraŭ Biełarusi Uładzimir Makiej zajaviŭ u intervju telekanału Euronews.
«Što tyčycca sankcyj… Dumaju, što my ruchajemsia napierad, pavolna, ale niaźmienna. Bólšaja častka abmiežavalnych mier była admieniena ŭ 2016 hodzie. U dvuchbakovym paradku zastalisia tolki niekatoryja sankcyi. U pieršuju čarhu, heta embarha na handal zbrojaj. Havorka idzie pra handal śpiecyfičnaj vajennaj technikaj, ale nie pra ekspart u cełym, i heta važna.
Sprava ŭ tym, što my b chacieli padtrymlivać narmalnyja adnosiny ź Jeŭrapiejskim sajuzam, u pieršuju čarhu handlova-ekanamičnyja.
My zacikaŭleny ŭ ekanamičnym supracoŭnictvie ź Jeŭrapiejskim sajuzam. Čamu? Tamu, što heta dazvalaje nam ŭmacoŭvać našu ekanomiku, zachoŭvać i ŭmacoŭvać palityčnuju niezaležnaść. Mienavita tamu my vielmi zacikaŭleny ŭ narmalnym handlovym i ekanamičnym uzajemadziejańni ź Jeŭrapiejskim sajuzam. Dumaju, što my pavolna ruchajemsia ŭ bok poŭnaj admieny sankcyj, i spadziajusia, što heta zdarycca ŭ najbližejšaj budučyni»,
— zajaviŭ ministr.
«Mnohaje ŭžo dasiahnuta, ale jašče šmat čaho treba zrabić. My razumiejem heta. Kali isnujuć niejkija adčuvalnyja temy — śmiarotnaje pakarańnie ci inšyja pytańni, — ja dumaju, što našy partniory pavinny ŭličvać kankretnyja abstaviny, umovy, situacyju tut, u našaj krainie.
Paŭtarusia, niemahčyma dasiahnuć ŭsiaho i adrazu. Niemahčyma lehčy spać u Savieckim Sajuzie, a pračnucca ŭ całkam jeŭrapiejskaj demakratyčnaj dziaržavie. Heta nie značyć, što my nie chočam vučycca. My hatovyja vučycca, u tym liku vyvučać jeŭrapiejskija «padručniki».
Ale doŭhi čas my žyli ŭ Savieckim Sajuzie, u savieckuju epochu. Šmat u kaho ŭ našaj krainie ŭsio jašče zachoŭvajecca savieckaja mientalnaść. Tamu što ŭ Savieckim Sajuzie nas vučyli, što nie indyvidualnyja pravy hrajuć hałoŭnuju rolu ŭ hramadstvie, a kalektyŭnyja pravy, sacyjalnyja pravy pavinny być dla nas na pieršym miescy. Prava na adukacyju, na pracu, na žyllo i hetak dalej. Da taho ž našy ludzi pryvykli žyć va ŭmovach, kali dziaržava kłapocicca pra ich. Jany zaŭsiody viedali, što mohuć raźličvać na dziaržavu. Hetaja mientalnaść ŭsio jašče ŭpłyvaje na situacyju ŭ našaj krainie.
Akramia taho, my bačym niehatyŭnyja prykłady ŭ niekatorych susiednich krainach. Mienavita tamu Biełaruś choča ruchacca napierad aściarožna, nie parušajučy stabilnaść u hramadstvie», — skazaŭ Makiej.
Kamientary