1500 udzielnikaŭ «Nieśmiarotnaha pałka» ŭ Minsku: heta mnoha ci mała? Paraŭnoŭvajem ź inšymi postsavieckimi stalicami INFAHRAFIKA

U Minsku na 9 Maja ŭ akcyi «Nieśmiarotny połk» uziało ŭdzieł 1500 čałaviek. Heta mnoha ci mała? My vyrašyli paraŭnać ź inšymi stalicami postsavieckaj prastory. Ź jakim razmacham tam pravodzili «Nieśmiarotny połk»?

Najbolš masavaja akcyja, kali pakinuć za dužkami Maskvu, adbyłasia ŭ Kišyniovie. Prezident Małdovy Ihar Dadon asabista ŭznačaliŭ šeście, jakoje naličvała ad 70 da 100 tysiač čałaviek. Novy prezident Małdovy ŭsio bolej hladzić u bok Rasii, a nie Jeŭrasajuza.

Hetaksama prezident uznačaliŭ kałonu ŭ Biškieku. Kiraŭnik Kyrhyzstana Saoranbaj Žeenbiekaŭ pryjšoŭ z partretam dzieda. Ahułam u stalicy Kyrhyzstana sabrałasia kala 45 tysiač čałaviek.

Pavialičyć

Vielmi maštabna «Nieśmiarotny połk» prajšoŭ u Astanie. Ad 15 da 30 tysiač čałaviek vyjšli na vulicy kazachstanskaj stalicy. Vyšejšaje kiraŭnictva Kazachstana nie ŭziało ŭdzieł u «Pałku», ale bolš drobnyja čynoŭniki, jak namieśnik akima Astany ci namieśnik hienprakurora vyjšli z partretami rodnych. U Ałmaty sabrałasia jašče bolš — kala 70 tysiač.

Tradycyjna šmatlikim atrymałasia šeście ŭ Ryzie. U Łatvii jašče z savieckich časoŭ žyvie šmat vychadcaŭ z Rasii, jakraz jany skłali bolšaść z tych, chto vyjšaŭ na vulicy Ryhi. Arhanizatary nazyvajuć lik 15 tysiač.

Pavialičyć

Prezident Armienii [Armienija — parłamienckaja kraina] Armien Sarkisian pavioŭ za saboj šeście «Nieśmiarotnaha pałka» ŭ Jerevanie. Ahułam na akcyju pryjšło kala 6 tysiač čałaviek.

U Kijevie akcyja mieła nazvu «Nichto nie zabyty, ništo nie zabytaje». Prachodziła jana pad pilnaj achovaj milicyi. Na akcyju źjavilisia ludzi z partretami z hulni World of Warcraft, jakija iranizavali z «Pałka». U Kijevie było kala 3 tysiač čałaviek.

Vielmi niaprosta acanić kolkaść udzielnikaŭ u Talinie. Niekatoryja estonskija sajty dajuć niekalki sotniaŭ, arhanizatary pišuć pra 4 tysiačy. My ŭziali siaredniuju ličbu — 2 tysiačy. Sajt «Sputnik» adznačaje, što ŭłady Estonii nijak nie zaminali ŭ praviadzieńni akcyi.

Pra 1500 ludziej, što vyjšli na vulicy Minska my ŭžo padrabiazna pisali. U asnoŭnym heta byli prarasijskija dziejačy i piensijaniery-kamunisty.

Pavialičyć

Mienš za 1000 čałaviek sabraŭ «Nieśmiarotny połk» u Vilni. U stalicy Tadžykistana Dušanbe vyjšła 500 čałaviek. 200-300 udzielnikaŭ padtrymali «Nieśmiarotny połk» u Baku. Usiaho sotnia pryjšła ŭ Tbilisi. Akcyja ŭ Taškiencie dazvolenaja nie była, ale ŭłady vyrašyli nie zatrymlivać udzielnikaŭ, i tam była sotnia čałaviek. U Ašchabadzie «Nieśmiarotny połk» adznačyli tolki na bazie ruskaj škoły.

• 0
• 0
• 0
• 0
• 0
• 0
• 0
• 0