Niepakoić Handuras… to bok Kaŭkaz

Novaabrany śpikier Pałaty Andrejčanka vydaŭ sentencyju što da pryznańnia/niepryznańnia miaciežnych hruzinskich pravincyj. U hetym pytańni, sa słoŭ byłoha načalnika Viciebščyny, musić być uličanaja dumka biełaruskaha narodu. Patas žalezny, ale, što całkam čakana, nijakaj kankretyki.

Mnie adrazu zhadałasia, jak u žniŭni, pa haračych śladoch kaŭkaskaje vajny, daviałosia dyskutavać z adnym znajomym pensyjaneram. «A ŭsio ž dobra našy dali dychtu hruzinam!» — vyhuknuŭ toj, kali arhumenty skončylisia.

I ja z hraničnaj vyraznaściu adčuŭ: čałaviek dasiul žyvie katehoryjami SSSR, i Maskva dla jaho — Centar, i rasiejskaje vojska — usio taja ž «niepobiedimaja i lehiendarnaja», pra jakuju śpiavali z kožnaha prasa za savieckim časam. Hruzinaŭ ža hety čałaviek apryjory ličyŭ vartymi samaha žorstkaha pakarańnia, bo tyja «paleźli na ruskich».

Vy skažacie: nu dyk čaho chacieć ad pensyjanera, zakanservavanaha ŭ saŭkovaj prapahandzie!

Tady pahladziecie vyniki vieraśnioŭskaha apytańnia NISEPD. Dyk voś, pohlady pieravažnaj balšyni našych suajčyńnikaŭ na kaŭkaskuju vajnu — prarasiejskija. U pryvatnaści, 63,2% — za niezaležnaść i mižnarodnaje pryznańnie Paŭdniovaj Asiecii dy Abchazii. I tolki niaščasnyja 5% — za viartańnie pad kantrol Hruzii.

Cikava, ci viedaje sp. Andrejčanka hetyja ličby? Kali viedaje, to jahonuju frazu možna traktavać jak zavualavanaje abiacańnie dahadzić Maskvie. Pra jaje interas, darečy, u dzień adkryćcia pieršaj sesii Pałaty novaha sklikańnia nahadaŭ ambasadar Rasiei Surykaŭ. Pabačym, maŭlaŭ, ci ŭłučać u paradak dnia vosieńskaj sesii toje pytańnie, jakoje abiacaŭ vynieści na razhlad novaha składu deputataŭ vaš prezydent.

Ale najchutčej što Andrejčankava adsyłka da narodu jość tradycyjnym sposabam nie skazać ničoha kankretnaha. Bo

vox populi dla našaha načalstva zusim nia jość śviatarnaj karovaj, choć i zaviedziena ličyć, što režym papuliscki.

Hladziecie: na samaj spravie Łukašenka ŭžo nia pieršy hod doŭžyć eksperyment z pryniaćciem absalutna niepapularnych («antynarodnych», jak lubiać kazać apazycyjnyja kamunisty) rašeńniaŭ.

Zhadajcie kantraktnuju systemu, pryhońnickaje raźmierkavańnie vypusknikoŭ VNU, budaŭnictva AES, skasavańnie lhot, školnuju antyreformu.

Čamu heta praktyčna nie adbivajecca na teflonavym rejtynhu aficyjnaha kiraŭnika? Heta asobnaja cikavaja tema. Adznaču mimachodź tolki toje, što tut pracuje kompleks čyńnikaŭ. Ad typova biełaruskaha «a mo' tak i treba?» (pamiatajecie anekdot pra ćvik u kreśle?) da paśladoŭnaha rostu dabrabytu. Tak, chaj sabie ŭ niemałoj stupieni za košt rasiejskaha hrantu, ale dasiul ułada vykonvała niepisany sacyjalny kantrakt z elektaratam: my vam — kiłbasu, vy nam — zhodu achviaravać ładnaj častkaj pravoŭ dy svabod.

Ale vierniemsia da pytańnia Abchazii i Paŭdniovaj Asiecii. Vidavočna, što, ciahnučy ryzinu, Łukašenka idzie de-fakta nasupierak nastrojam ajčynnaha socyjumu. Darečy, jak i ŭ pytańni zbližeńnia z Eŭraźviazam. Sacyjolahi adznačajuć «eŭrapiejski minimum»: dola eŭraentuzijastaŭ (hatovych prahałasavać za ŭstupleńnie ŭ EZ na hipatetyčnym referendumie) apuściłasia u našym hramadztvie da 26,7%. Paraŭnajcie: u śniežni 2002 hodu było 60,9% (vo kali tre' było farsavać tuju «narmalizacyju»! :).

I naadvarot, blizu pałovy — 46,3% — hatovyja byli ŭ vieraśni 2008-ha prahałasavać za abjadnańnie z Rasiejaj. Pry žadańni zładzić anšlus — jak dvojčy dva, navat bieź vialikich naciažak. Ale ž nia ŭsio tak prosta…

Dyk ci daciśnie Kreml u pytańni pryznańnia miaciežnych hruzinskich terytoryj? Viadoma ž, heta vyrašaje nie Andrejčanka, nie «sterylnaja pałata» i navat nia vox populi. Z «voksam» u nas, jak bačym — pa abstavinach… Asabliva ŭ mižnarodnych spravach (zhadajma jašče adzin saviecki anekdot: «Mianie niepakoić Handuras» :)

Pryznańnie — hetaja taja fihura, jakoj Łukašenka ŭ svaim seansie hulni na dźviuch doškach — uschodniaj i zachodniaj — moža achviaravać, kali:

a) Rasieja pojdzie na ščodryja finansava-ekanamičnyja lhoty (cana hazu, umovy kredytu i h.d.); b) tre' budzie adkupicca takim čynam ad bolej niebiaśpiečnych varyjantaŭ (kštałtu adzinaha rubla, kanstytucyjnaha aktu pa versii Maskvy); v) palacić pad adchon dyjaloh z Zachadam.

Pakul što kanfihuracyja hetych dynamičnych čyńnikaŭ nie fatalnaja. Va ŭsiakim razie, u paradku dnia čarhovaj sesii Surykaŭ žadanaha pytańnia moža i nie pabačyć. Chacia, kali pryciśnie, jaho prakruciać, sami razumiejecie, u momant voka.

• 0
• 0
• 0
• 0
• 0
• 0
• 0
• 0