SBU zatrymała jašče adnaho padazravanaha ŭ padrychtoŭcy zabojstva žurnalista Arkadzia Babčanki.
Śpiecsłužba zatrymała hramadzianina Ukrainy «T» 13 červienia. Pavodle infarmacyi SBU, zatrymany vykonvaŭ rolu kiraŭnika hrupy z troch ukraincaŭ, jakija pad kantrolem rasijskaj śpiecsłužby treniravalisia ŭ Rastovie-na-Donie dla praviadzieńnia sieryi teraktaŭ va Ukrainie.
Pra heta paviedamiŭ namieśnik načalnika hałoŭnaha śledčaha ŭpraŭleńnia viedamstva Bahdan Tyvadar na bryfinhu ŭ Kijevie 15 červienia, pieradaje 112 Ukraina.
Doma ŭ «hramadzianina T.» padčas praviadzieńnia pieratrusu kanfiskavali ahniastrelnuju zbroju i bojeprypasy.
Zaraz jaho padazrajuć u ździajśnieńni złačynstva, praduhledžanaha č. 1 art. 263 (Niezakonnaje abychodžańnie sa zbrojaj i vybuchovymi rečyvami), a taksama ŭ arhanizacyi padrychtoŭki teraktu.
Raniej pa spravie ab padrychtoŭcy zamachu na Babčanku byŭ zatrymany Barys Hierman.
Taksama na bryfinhu Tyvadar pradstaviŭ razmovu Hiermana i jaho kuratara ŭ Rasii Viačasłava Pivavarnika pa spravie Babčanki, a taksama Hiermana i nienazvanaha śviedki. Jany abmiarkoŭvali padrychtoŭku zabojstva Babčanki i šlachi dastaŭki zbroi i bojeprypasaŭ.
Kamientary