Na biełaruskuju žurnalistku milicyja skłała pratakoł za fotarepartaž ź Niepała
Niezaležnaja žurnalistka z Homiela Łarysa Ščyrakova pabyvała ŭ Himałajach. Paśla viartańnia jaje naviedaŭ učastkovy inśpiektar i skłaŭ administracyjny pratakoł.
Učastkovy inśpiektar Siarhiej Prymakoŭ abvinavaciŭ žurnalistku ŭ pracy biez akredytacyi na karyść spadarožnikavaha telekanała «Biełsat» (Niezakonny vyrab albo raspaŭsiud pradukcyi ŚMI, č.2, artykuł 22.9 KaAP).
«U biełaruskich milicyjantaŭ dziŭnaja łohika: fotazdymki ja rabiła ŭ Niepale ŭ Himałajach, padčas uzychodžańnia na haru Manasłu, a mianie vinavaciać, što ja, budučy nieakredytavanaj u Respublicy Biełaruś, ažyćciaŭlała prafiesijnuju dziejnaść jak žurnalistka zamiežnaha ŚMI.
U Niepale da mianie pretenzijaŭ nie było, a ŭ rodnaj Biełarusi źjavilisia. Tak i chočacca paŭtaryć słovy ź viadomaha šlahiera: «Adpuścicie mianie ŭ Himałai», — skazała Łarysa Ščyrakova.
Žurnalistka źviartaje ŭvahu na niedarečnaść i inšych farmulovak u administracyjnym pratakole. Pavodle ŭčastkovaha Prymakova, jana nibyta raźmiaściła «artykuł u vyhladzie siužeta ŭ efiry telekanała», choć fotarepartaž byŭ źmieščany tolki na sajcie.
«I śmiech, i hrech. Ale ž takuju abrakadabru sudy razhladajuć usurjoz i vynosiać astranamičnyja štrafy», — dadaje Ščyrakova.
Kali sud Homielskaha rajona razhledzić vyšejzhadany milicejski pratakoł, pakul nieviadoma — pozvy jašče niama.
Tym časam 6 lipienia žurnalistku Ščyrakovu vyklikajuć u Rečycki rajonny sud — musić adbycca sud iznoŭ-taki za žurnalisckuju dziejnaść biez akredytacyi. Łarysu abvinavačvajuć u padrychtoŭcy siužeta «Siońnia ŭ bitumnaj jamie hinie žyvioła, zaŭtra — ludzi?»
Kamientary