U kitajskim internet-hihancie Alibaba kapirajtaraŭ zamianili na štučny intelekt
Raspracoŭščyki kitajskaj kampanii Alibaba Group stvaryli prahramu, jakaja zamianiaje pracu kapirajtara: jana moža hienieravać padrabiaznaje tekstavaje apisańnie tavaru, paviedamlaje N+1.
Sistema pracuje na asnovie mietadaŭ hłybokaha navučańnia i mietadaŭ apracoŭki naturalnaj movy, a dla jaje navučańnia vykarystoŭvalisia niekalki miljonaŭ prykładaŭ, stvoranych realnymi ludźmi.
Zvyčajna nad stvareńniem apisańnia tavaraŭ u internet-kramach pracujuć markietołahi i kapirajtary. Dla nievialikaj handlovaj sietki heta nie vielmi składanaja zadača, ad jakoj zaležyć dosyć vialikaja častka prybytku. Dla bujnych kampanij, takich, jak, naprykład, Amazon abo padraździaleńni Alibaba Group, padobnych apisańniaŭ patrabujecca ŭ niekalki tysiač razoŭ bolš, čym dla zvyčajnaj internet-kramy, i dla takoha kapirajtynhu možna vykarystoŭvać štučnaha hienierujemyja teksty. Ich prablema, adnak, u niedaskanałaści mietadaŭ apracoŭki naturalnaj movy: stvorany kampjutaram tekst dosyć lohka adroźnić ad napisanaha čałaviekam.
Daśledniki śćviardžajuć, što stvaryli prahramu dla kapirajtynhu, vyniki pracy jakoj niemahčyma adroźnić ad čałaviečych.
Pa słovach raspracoŭščykaŭ, takaja sistema moža stvarać kala 20 tysiač radkoŭ tekstu ŭ siekundu i ŭžo vykarystoŭvajecca nie tolki ŭ internet-kramach Alibaba Group. Karystalniki prahramy mohuć samastojna vybrać daŭžyniu tekstu i styl apisańnia. Pakul što razumny kapirajtynh dastupny tolki dla kitajskaj movy; ci buduć raspracoŭščyki pašyrać mahčymaści i vykarystoŭvać inšyja movy pakul što nieviadoma.
Kamientary