Da «Barmaleja», jaki pakazvaŭ faki kryžam u Kurapatach, zavitali načnyja hości
Žychar Minska Alaksandr Kudłajeŭ zasłužyŭ sabie sumnieŭnuju reputacyju paśla naviedvańnia restarana «Pajedziem, pajadzim» u Kurapatach. 45-hadovy mužčyna nie prosta pryjechaŭ za kalcavuju, kab papić piva, ale i ździejśniŭ pierformans, pakazvajučy «faki» kryžam.
Kudłajeŭ, jaki maje nik u tvitary «Barmalej», u intervju «NN» kazaŭ:
«Ja ŭžo bačyŭ, što mnie pajšli pahrozy, navat majmu sabaku. Dy kali łaska. Ja ŭžo za piać hadoŭ zvyksia, što dalej za pahrozy sprava nie dachodzić».
Pry hetym jon vykłaŭ u sacyjalnych sietkach usie svaje kantakty, a taksama chatni adras.
Supołka Ukantakcie «Heta Minsk, dzietka» źjaviŭsia fotazdymak, dzie ŭžo samomu Kudłajevu pakazvajuć siaredni palec. «Dobrazyčlivyja hramadzianie zładzili pierformans u jaho na chacie i patłumačyli «Barmaleju», što tak rabić nielha», — hučyć podpis da fota.
Sam Kudłajeŭ u razmovie z «NN» paćvierdziŭ, što piaciora čałaviek pryjechali da jaho a 23:10. U tvitary jon udakładniaje, što hości byli ŭ majkach z Pahoniaj.
«Barmalej» prapanavaŭ im vyjści na vulicu.
«Jany ŭsio heta zapisvali na kamieru, ale čamuści vykłali tolki hety «fak». Kali b vykłali ŭsio, to byli b u niepryvabnym śviatle. Bo ja im vykazaŭ usio, što pra ich dumaju, a jany prosta raźviarnulisia i syšli», — skazaŭ Kudłajeŭ.
Pisać zajavu ŭ milicyju «Barmalej» nie źbirajecca, ale choča znajści videa z kamiery doma, kab vykłaści ŭ internet. «Mnie nie pahražali, kali b pahražali, to ŭžo b lažali tam, ja čałaviek darosły», — skazaŭ mužčyna.
«Nijakich prabačeńniaŭ ja nie prasiŭ», — zapeŭnivaje «Barmalej».
Kamientary