Što adbyvajecca paśla taho, jak minčuk patelefanavaŭ na numar 102

Za košt čaho milicejskim naradam udajecca prybyvać na miesca ździajśnieńnia złačynstva za ličanyja chviliny i jak z dapamohaj videakamier pravaachoŭniki znachodziać złamyśnikaŭ, ahienctvu «Minsk-Naviny» raspavioŭ načalnik adździeła apieratyŭna-dziažurnaj słužby HUUS Minharvykankama Vital Apanovič.

— Zaŭsiody było cikava, što adbyvajecca paśla taho, jak haradžanin patelefanavaŭ na numar 102.

— Apieratar słužby milicyi «102» unosić atrymanyja ad zajaŭnika źviestki ŭ elektronnuju kartku paviedamleńniaŭ. Dziakujučy joj supracoŭniku nie treba dumać, u jaki RUUS nakiravać infarmacyju. Śpiecyjalnaja prahrama aŭtamatyčna pieradaje źviestki ŭ apieratyŭna-dziažurnyja słužby (ADS) u zaležnaści ad miesca ździajśnieńnia supraćpraŭnych dziejańniaŭ. Heta dazvalaje apierataru marnavać u siarednim nie bolš za chvilinu na pryjom paviedamleńnia i apracoŭku infarmacyi.

— U čym zaklučajecca praca ADS?

— U pieršuju čarhu našy supracoŭniki kruhłasutačna kantralujuć apieratyŭnaje stanovišča na daručanaj im terytoryi, kaardynujuć siły i srodki, zadziejničanyja ŭ achovie hramadskaha paradku, i kirujuć imi. U dziažurnaha na manitory kampjutara pastajanna abnaŭlajecca infarmacyja ab učynienych złačynstvach i pravaparušeńniach, i jon u samyja karotkija terminy vyrašaje, kaho nakiravać na miesca zdareńnia.

— Jak dziažurny vyznačaje, chto z pravaachoŭnikaŭ bližej i, adpaviedna, chutčej adreahuje na vyklik?

— Raniej vykarystoŭvali tak zvanuju rasstanoŭku milicejskich naradaŭ. U žurnale ŭkazvali maršrut patrulavańnia. Dziažurny viedaŭ, u jaki čas i na jakim učastku znachodzilisia supracoŭniki. Ciapier va ŭsich patrulnych, a taksama ŭ naradaŭ Departamienta achovy MUS Respubliki Biełaruś jość radyjostancyi z modulami GPS, dziakujučy čamu možna prosta adsačyć miescaznachodžańnie. Ich pieramiaščeńni bačnyja na elektronnaj karcie. Pa joj dziažurny i vyznačaje, jaki z naradaŭ zdolny chutčej prybyć pa nazvanym u paviedamleńni adrasie. Dalej patrul atrymlivaje ŭsiu infarmacyju ab zdareńni pa radyjosuviazi i prymaje adpaviednyja miery. Varta nahadać: kali ŭ słužbu «102» pastupaje paviedamleńnie ab ździajśnieńni dziejańnia, jakoje paśla moža traktavacca jak administracyjnaje pravaparušeńnie, to čas prybyćcia pieršaha narada składaje da 25 chvilin. Kali uhledžvajucca prykmiety złačynstva — da 10 chvilin. Dziažurnyja kantralujuć vykanańnie hetych terminaŭ. Paśla ŭkaranieńnia elektronnaj karty i sistemy GPS kantralavać narady i kiravać imi stała praściej. Taksama pavysiłasia efiektyŭnaść raboty patrulnych.

— Raskažycie, jakija zadumki jość u HUUS, kab jašče bolš apieratyŭna reahavać na paviedamleńni hramadzian.

— U minułym hodzie pa našaj inicyjatyvie stvaryli śpiecyjalnyja hrupy chutkaha reahavańnia (SHCHR) u padraździaleńniach, jakija absłuhoŭvajuć terytoryi ź vialikaj kolkaściu nasielnictva, — u Frunzienskim i Maskoŭskim RUUS. Zadača takich hrup u tym, kab pa prybyćci pa vykliku nie tolki spynić parušeńnie zakona, ale i aformić nieabchodnyja dakumienty. Zvyčajny małodšy kiraŭničy skład (ad siaržanta da praparščyka) nie moža składać pracesualnyja dakumienty, tamu časta prychodzicca dadatkova padklučać aficeraŭ. Naprykład, takaja situacyja — skandał u siamji. Narad pryjechaŭ i spyniŭ pravaparušeńnie — supakoiŭ debašyra. Kali ŭ dziejańniach skandalista ŭhledžvajecca administracyjnaje pravaparušeńnie, to dadatkova vykliku miascovaha ŭčastkova, kab jon aformiŭ pratakoł. Supracoŭniki SHCHR prajšli pierapadrychtoŭku i majuć prava afarmlać takija dakumienty samastojna i, adpaviedna, nie pryciahvać dadatkovyja siły. U Frunzienskim rajonie padobnaja hrupa ŭ siarednim vyjazdžaje na 20 vyklikaŭ. Kali jany na praciahu hetaha hoda pakažuć dobry vynik, to my vystupim ź inicyjatyvaj stvaryć SHCHRy i ŭ inšych rajonnych upraŭleńniach stalicy.

— Z kožnym hodam na vulicach Minska stanovicca ŭsio bolš kamier videanazirańnia. Nakolki jany dapamahajuć u pracy?

— U 2013 h. pierad čempijanatam śvietu pa chakiei byŭ padpisany Ukaz prezidenta Biełarusi № 527 «Ab pytańniach stvareńnia i vykarystańnia sistemy videanazirańnia ŭ intaresach zabieśpiačeńnia hramadskaha paradku». Paśla hetaha miascovyja orhany ŭłady atrymali mahčymaść zaćviardžać pieraliki abjektaŭ, jakija padlahajuć abaviazkovamu abstalavańniu sistemami videanazirańnia. U vyniku ich pačali aktyŭna ŭkaraniać nie tolki ŭ Minsku, ale i ŭ krainie ŭ cełym. Tady ž mnohija anałahavyja kamiery zamianili na ličbavyja, jakija dajuć bolš jakasny malunak. U 2017-m źjaviŭsia jašče adzin dakumient, jaki spryjaje raźvićciu sistemy videanazirańnia ŭ krainie, — Ukaz prezidenta Biełarusi № 187 «Ab respublikanskaj adzinaj sistemie manitorynhu i hramadskaj biaśpiecy». Płanavałasia, što ŭsie kamiery i śpiecyjalnyja detektary (datčyki dymu, połymia, vybuchovych, narkatyčnych i radyjeaktyŭnych rečyvaŭ) padklučać da adzinaj respublikanskaj sietki pieradačy dadzienych. Zaraz u HUUS padobnaja sistema. Da jaje padklučana bolš za 1 600 kamier. Usie jany ŭstalavany na asnoŭnych praśpiektach i vulicach stalicy, a taksama na spartyŭnych i kulturnych abjektach, takich jak «Čyžoŭka-Arena», «Minsk-Arena», Pałac sportu. Dziažurny ADS u lubym momant moža pahladzieć vyjavu z kožnaj z hetych kamier.

— Čuŭ, u budučyni takaja sistema dazvolić litaralna za paru siekund znajści złačynca pa fatahrafii.

— Našy techničnyja śpiecyjalisty testujuć prahramu pa apracoŭcy videa z kamiera i aŭtamatyčnym raspaznavańni čałavieka. Dziakujučy joj dziažurny zmoža atrymać infarmacyju pra toje, što ŭ abjektyŭ kamiery, naprykład, na stancyi mietro «Instytut kultury», trapiŭ čałaviek, u jakoha padabienstva z čałavieka, jakoha my šukajem, składaje da 90%. Dziažurny pierahladaje atrymanaje z kamiery videa i vyrašaje, ci varta nakiroŭvać u nazvanaje miesca narad. Takaja sistema daść mahčymaść nie tolki znachodzić złačyncaŭ i źnikłych ludziej pa fota, ale i atrymlivać infarmacyju pra zatory, avaryi, miescaznachodžańnie skradzienych aŭto.

— Čaho vy čakajecie ad hetaj analityčnaj sistemy? Jaki kančatkovy pradukt?

— Byli ŭ kamandziroŭcy ŭ Maskvie, dzie ŭžo daŭno pracuje anałahičnaja prahrama. Tam analityčnaja sistema padaje dziažurnamu infarmacyju, dziakujučy jakoj možna skłaści maršrut ruchu čałavieka, jakoha šukajuć, i časam navat vyznačyć miesca jaho pražyvańnia. Z dapamohaj takoj prahramy ŭ stalicy Rasijskaj Fiederacyi raskryvajucca mnohija złačynstvy. Čakajem anałahičnaha vyniku i ad našaj sistemy.

• 0
• 0
• 0
• 0
• 0
• 0
• 0
• 0