«Zdaŭsia dobraachvotna, pryznaŭ vinu». Što viadoma pra aryštavanaha va Ukrainie biełarusa z «DNR»

Hramadzianin Biełarusi, zatrymany 10 žniŭnia specsłužbami Ŭkrainy na padkantrolnaj Kijevu terytoryi Danieckaj vobłaści i abvinavačany ŭ stvareńni terarystyčnych arhanizacyj, źmieščany ŭ śledčy izalatar Maryjupalu, piša Radyjo Svaboda.

Tam jon budzie znachodzicca na praciahu ŭsiaho dasudovaha raśśledavańnia — jak minimum da 8 kastryčnika. Advakat nazvaŭ Svabodzie vierahodnaje proźvišča zatrymanaha — Novikaŭ.

Jak paviedamiła Svabodzie krynica ŭ pravaachoŭnych orhanach Ukrainy, imavierna, što paśla zaviaršeńnia raśśledavańnia spravu mohuć nakiravać dla razhladu ŭ Kramatorski haradzki sud abo inšy sud Danieckaj vobłaści — adpaviedna administracyjnaj prynaležnaści miesca zatrymańnia.

Rodam ź Viciebsku, maje dzicia

Viadoma, što zatrymany biełarus naradziŭsia ŭ Viciebsku, raniej užo byŭ asudžany ŭ Biełarusi, maje dzicia 2009 hodu naradžeńnia.

Na sudovym pracesie, kali abirałasia miera strymańnia, jon pryznaŭ svaju vinu i nie asprečvaŭ nieabchodnaści aryštu. Aryštavać jaho patrabavaŭ śledčy Słužby biaśpieki Ŭkrainy.

Advakat zatrymanaha biełarusa Alaksandar Harełaŭ skazaŭ Svabodzie, što jahony padabaronny «dobraachvotna prybyŭ u orhany SBU i supracoŭničaje sa śledztvam».

Adnak u aficyjnym paviedamleńni prakuratury adznačajecca, što biełarus «byŭ vykryty supracoŭnikami SBU i prakuratury», kali 10 žniŭnia prybyŭ na terytoryju Ŭkrainy «dla praciahu svajoj supraćpraŭnaj dziejnaści».

Nia vyklučana, što biełaruskija ŭłady paspryjali aryštu

Śledčyja abhruntoŭvali padazreńni adnosna biełarusa ŭ ździajśnieńni asabliva ciažkaha złačynstva pratakołam jaho dopytu i ahladu, a taksama «materyjałami, sabranymi aperatyŭnymi padraździaleńniami zhodna z častkaj 2 artykuła 99 Kryminalnaha pracesualnaha kodeksu Ŭkrainy».

Jak sfarmulavana ŭ hetaj zakanadaŭčaj normie, — na padstavie «materyjałaŭ, atrymanych u vyniku ažyćciaŭleńnia padčas kryminalnaj vytvorčaści mierapryjemstvaŭ, praduhledžanych dziejnymi mižnarodnymi damovami, zhoda na abaviazkovaść jakich dadzienaja Viarchoŭnaj Radaj Ukrainy». Havorka moža iści ab nadańni pravavoj dapamohi z boku Biełarusi.

U toj ža čas advakat Harełaŭ, jaki ŭdzielničaŭ u sudovym pracesie pa abrańni miery strymańnia, u razmovie sa Svabodaj nie paćvierdziŭ naŭprost, što abvinavačańnie było vystaŭlenaje na padstavie źviestak, pieradadzienych Biełaruśsiu.

«Materyjały ŭ sud nakiroŭvajuć orhany dasudovaha raśśledavańnia, a sud užo razhladaŭ hetyja materyjały. I havorka išła ab tym, što jon źviarnuŭsia ŭ adpaviednyja orhany dobraachvotna i biez prymusu. Kali hetyja fakty buduć paćvierdžanyja ŭžo na sudovym śledztvie, tady budzie ŭžo zusim inšy scenar i moža być inšaja častka artykuła. U pryncypie, jaho mohuć vyzvalić, ale heta jak užo sud uchvalić rašeńnie», — skazaŭ Svabodzie Alaksandar Harełaŭ.

Razam z tym advakat admoviŭsia paviedamić inšyja padrabiaznaści spravy i akaličnaści zatrymańnia biełarusa, nie nazvaŭ poŭnaha imia hramadzianina Biełarusi, abmiežavaŭšysia tolki proźviščam — Novikaŭ. «Ja nia maju prava razhałošvać takija momanty», — skazaŭ jon.

Što pahražaje zatrymanamu

Hramadzianin Biełarusi padazrajecca ŭ stvareńni terarystyčnaj hrupy abo terarystyčnaj arhanizacyi — zhodna z častkaj 1 artykuła 258-3 Kryminalnaha kodeksu Ŭkrainy za hetaje złačynstva praduhledžvajecca pazbaŭleńnie voli na termin ad 8 da 15 hadoŭ.

Pavodle papiaredniaj infarmacyi Hieneralnaj prakuratury Ŭkrainy, hramadzianin Biełarusi trapiŭ u šerahi «DNR» u listapadzie 2014 hodu. U zvańni staršaha siaržanta jon słužyŭ u 1-m asobnym tankavym bataljonie «Samali» na pasadzie kamandzira tanka, za što atrymlivaŭ štomiesiac hrašovaje ŭznaharodžańnie. U 2015 hodzie biełarus taksama braŭ aktyŭny ŭdzieł u zachopie Danieckaha aeraportu. U tym ža hodzie pakinuŭ słužbu, adnak u 2017 hodzie viarnuŭsia ŭ Danieck i byŭ zaličany ŭ adnu z vajskovych častak tak zvanaj «DNR».

U sudovym rašeńni ab aryšcie hramadzianina Biełarusi ŭdakładniajecca, što «jon byŭ vyklučany sa śpisaŭ słužboŭcaŭ vajskovaj častki 08809 na padstavie tak zvanaha zahadu kamandzira hetaha farmavańnia ad 16 červienia 2015 hodu».

• 0
• 0
• 0
• 0
• 0
• 0
• 0
• 0