Dzieviaciarych dziaciej, jakich uviesnu zabrali ŭ šmatdzietnaj siamji ŭ Radaškovičach, viarnuli baćkam. Šaściora dziaciej buduć z mamaj i tatam užo siońnia. Troje samych maleńkich — bližej da vychodnych, piša Tut.by.
Paśla incydentu šaściarych dziaciej adravili ŭ prytułak pry Radaškovickaj škole-internacie, troch samych maleńkich uziali pad apieku svajaki mamy. U červieni sud pryznaŭ žančynu vinavataj u tym, što jana biła dziaciej ramianiom, i prysudziŭ da štrafu 15 bazavych (360 rubloŭ 50 kapiejek).
- 22 žniŭnia rašeńniem kamisii pa spravach niepaŭnaletnich ŭsich dzietak viarnuli baćkam, - raspaviadaje Volha Klepakova, namieśnik staršyni KDN Maładziečanskaha rajvykankama. - Šaściora rabiat, jakija znachodzilisia ŭ prytułku, buduć doma ŭžo siońnia. Troje samych maleńkich — da vychodnych. Zaraz jany ŭ pryjomnaj siamji, rychtujecca rašeńnie na ich viartańnie.
Za piać miesiacaŭ, pakul dzieci byli nie ŭ siamji, mama z tatam uśviadomili: bić dziaciej ramianiom nielha — i vypravilisia.
- Baćki vielmi rady, što dzieci viartajucca, my ŭpieršyniu ŭbačyli, jak jany ŭśmichajucca. Dzieci taksama vielmi chočuć dadomu, — kaža Volha Klepakova. — U apošni čas mama z tatam išli na kantakt. Dla ŭsich dzietak abstalavali doma adsutnyja spalnyja miescy. Na dušy spakojna, što situacyja źmianiłasia ŭ lepšy bok.
— A što ź Jahoram, jaki raspavioŭ pra ŭsio, što adbyvałasia ŭ siamji?
— Niejki čas jon nie kantaktavaŭ z baćkami, ale ciapier užo kamunikuje i choča dadomu.
Usie hetyja piać miesiacaŭ mama pracavała na pradpryjemstvie ŭ Maładziečnie. Ciapier jana znoŭ vierniecca ŭ dekret: budzie hladzieć małych. Nazirać za siamjoj taksama praciahnuć, šeść miesiacaŭ za imi budzie pryhladać škoła.
Kamientary