U 2015 jon vyłučaŭsia ŭ prezidenty Biełarusi, a ciapier jaho pasadzili na dzieviać hadoŭ za narkatu

Fatohraf Alaksandr Judajeŭ z Navapołacka trapiŭ u miedyjnuju prastoru ŭ 2015 hodzie, kali pasprabavaŭ bałatavacca ŭ prezidenty krainy. Judajeŭ padaŭ u CVK inicyjatyŭnuju hrupu ŭ składzie 107 čałaviek, ale ŭ dvanaccaci ź ich byli znojdzienyja pamyłki ŭ bijahrafijach i imionach. U vyniku CVK admoviła jamu ŭ rehistracyi.

Ciapier Judajeŭ trapiŭ za kraty pa narkatyčnym artykule. Dzieviać hadoŭ jon praviadzie va ŭstanovach uzmocnienaha režymu.

Pavialičyć

Judajevu 39 hadoŭ. Raniej jon pracavaŭ u navapołackim Pałacy mastactvaŭ, haziecie «Vieśnik Naftana». Alaksandr ź niaprostaj siamji.

Jahony baćka Anatol Judajeŭ na praciahu bolš čym 20 hadoŭ byŭ namieśnikam hienieralnaha dyrektara zavoda «Naftan». «Majo vyłučeńnie ŭ prezidenty jon nie ŭsprymaje ŭsurjoz», — kazaŭ tady Judajeŭ.

«Jość peŭnyja mistyčna-histaryčnyja padziei, jakija kažuć pra toje, što ŭsio moža źmianicca. Jość praroctva, što Alaksandr Łukašenka byŭ błasłavionym biełaruskimi duchoŭnymi asobami na 21 hod kiravańnia», — tłumačyŭ Judajeŭ svajo vyłučeńnie.

Uvohule, Judajeŭ schilny da peŭnaha mistycyzmu. Na svajoj staroncy Ukantakcie jon siabie nazyvaje nastupnym čynam: «Mietapalityk, pradstaŭnik dypłamatyčnaj misii duchoŭnaha abjadnańnia mietahałaktyki na płaniecie Ziamla, pa sumiaščalnictvie: kryejtar, daśledčyk, naziralnik, aptymizatar, multyśpiecyjalist, šmatdzietny baćka, kandydat u prezidenty Respubliki Biełaruś».

U «pieradvybarčych» intervju jon kazaŭ, što hatovy dać Łukašenku pasadu premjer-ministra, a Krym pryznać rasijskim. Pry hetym Judajeŭ ličyŭ, što Biełaruś i Rasija pavinny abjadnoŭvacca «duchoŭna».

Jak paviedamili «Našaj Nivie» ŭ sudzie Navapołacka, kryminalnaja sprava suprać Alaksandra Judajeva pastupiła da ich 5 sakavika 2018 hoda.

16 maja jon byŭ pryznany vinavatym pa č. 3 art. 328 Kryminalnaha kodeksa «Niezakonny z metaj zbytu vyrab, pierapracoŭka, nabyćcio, zachoŭvańnie, pieravozka abo pierasyłka abo niezakonny zbyt narkatyčnych srodkaŭ, psichatropnych rečyvaŭ, ździejśnieny hrupaj asobaŭ, albo słužbovaj asobaj z vykarystańnie słužbovych paŭnamoctvaŭ, albo zbyt narkatyčnych srodkaŭ va ŭstanovach adukacyi, achovy zdaroŭja, vajskovych častkach, albo zahadzia niepaŭnaletnim».

Sud prysudziŭ Alaksandra Judajeva da 9 hadoŭ źniavoleńnia z kanfiskacyjaj majomaści. Mužčyna musić adbyvać pakarańnie va ŭstanovach uzmocnienaha režymu.

Alaksandr Judajeŭ — baćka čatyroch dziaciej. Jahonaja siamja pakul nie kamientuje toje, što adbyłosia. Sa źniavoleńnia Judajeŭ dasyłaje vieršy.

• 0
• 0
• 0
• 0
• 0
• 0
• 0
• 0