U 2017 hodzie biełarusy vypili pa 8 litraŭ «čarniła» na čałavieka
U 2017 hodzie biełarusy vypili 76,4 miljona litraŭ pładova-jahadnaha vina. Heta pa 8 litraŭ «čarniła» na čałavieka, uklučna ź niemaŭlatami i kormiačymi maci. Takija źviestki ŭtrymlivajucca ŭ statystyčnym zborniku «Bałansy tavarnych resursaŭ Respubliki Biełaruś», apublikavanym Nacyjanalnym statystyčnym kamitetam, piša Jeŭraradyjo.
Pry hetym za 2017 hod vypita na 7,7 miljona litraŭ «čarniła» mienš, čym u 2016 hodzie. Za apošnija piać hadoŭ spažyvańnie i vytvorčaść pładova-jahadnaha vina źmienšyłasia amal što ŭdvaja. Jano nie idzie na ekspart — heta napoj vyklučna dla ŭnutranaha spažyvańnia.
Kolki inšaha ałkaholu biełarusy vypili ŭ 2017 hodzie?
Piva ŭ 2017 hodzie vypili na 9,4 miljona litraŭ bolš, čym ŭ 2016-m. I na kožnaha biełarusa ŭ siarednim atrymałasia kala 46 litraŭ piva. 439,9 miljona litraŭ vypitaha piva — heta jak 154 akvaparka «Labiažy», kali ŭličyć usie najaŭnyja tam basiejny. Vytvorčaść piva płanamierna pavialičvajecca amal štohod.
Harełki i likiora-harełačnych vyrabaŭ biełarusy vypili za 2017 hod u siarednim pa 11,4 litra na čałavieka. Heta pa litry za 11 miesiacaŭ hoda i adzin razhruzačny miesiac. Uvohule, za 2017 hod biełarusy vypili 108,5 litra harełki i likiora-harełačnych vyrabaŭ. Heta na 3,8 miljona litraŭ bolš, čym u 2016 hodzie.
Vinahradnaha vina za 2017 hod było vypita 39,3 miljona litraŭ. Usiaho pa 4 litry vina na kožnaha biełarusa. Vytvorčaść vinahradnych vin pavialičvajecca, za prošły hod jana skłała 31,3 litra.
Pienistaha vina ŭ 2017-m było vypita na 530 tysiač litraŭ bolš, čym u 2016 hodzie. Ci pa 1,6 litra na kožnaha biełarusa. U nas stała bolš nahod dla radaści? Moža, bolš viasiellaŭ, a moža, bolš paminak… Ci paŭlitra na dzień naradžeńnia, paŭlitra na Novy hod i paŭlitra ŭ zanačcy na asablivy vypadak?
Mienš za ŭsio biełarusy pjuć kańjaku i brendzi. Usiaho pa paŭlitra ŭ hod. Vierahodna, heta na vypadak sustrečy sa starymi siabrami, jakich nie bačyŭ paru hadoŭ. Ci dla viasiołych pasiadziełak u «Centralnym». Usiaho za 2017 hod było vypita 5,3 miljona litraŭ brendzi i kańjaku.
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary