Prezydent ZŠA Donald Tramp zmoh značna pavialičyć svajo bahaćcie dziakujučy «sumnieŭnym padatkovym chitrykam» i «adkrytamu machlarstvu z padatkami». Pra heta havorycca ŭ materyjale, jaki apublikavanym u hazecie New York Times, jakaja praviała šmatmiesiačnaje raśśledavańnie finansavych i padatkovych aperacyj baćki Trampa, paviedamlaje Radyjo Svaboda.
Aŭtary materyjału śćviardžajuć, što Donald Tramp atrymaŭ ad svajho baćki, ńju-jorkskaha miljanera Freda Trampa, kapitał u pamiery kala 413 młn dalaraŭ. Heta ličba razychodzicca z aficyjnaj versijaj Donalda Trampa. Jon śćviardžaje, što baćka daŭ jamu na raźvićcio biznesu kredyt na 1 młn dalaraŭ.
U artykule havorycca, što Fred Tramp pačaŭ tajemna pieradavać hrošy Donaldu Trampu i inšym svaim dzieciam šmat hadoŭ tamu i što spadčyńniki Freda Trampa da hetaha času atrymlivajuć dyvidendy ad dziejnaści kampanii Tramp-starejšaha, jaki pamior u 1999 hodzie.
Bahaćcie Freda Trampa, pieradadzienaje jaho čatyrom dzieciam, skłała kala miljarda dalaraŭ. Padatak na hetuju sumu pavinien byŭ dasiahnuć 550 miljonaŭ dalaraŭ, adnak u vyniku roznych padatkovych maneŭraŭ, piša hazeta, siamja vypłaciła dziaržavie 52 miljona 200 tysiač dalaraŭ.
Aŭtary materyjału abvinavacili Donalda Trampa ŭ tym, što jon dapamoh baćku pavialičyć bahaćcie dziakujučy sumnieŭnym padatkovym schiemam, uklučajučy niezakonnaje atrymańnie padatkovych vyličeńniaŭ. Žurnalisty miarkujuć, što ciapierašni prezydent ZŠA śviadoma zaniziŭ acenku chołdynhu Trampa, kab značna źmienšyć padatkovy ciažar.
Jašče ŭ artykule havorycca, što Donald Tramp i jahonyja braty zasnavali padstaŭnuju karparacyju, jakaja patrebnaja była im dla utojvańnia najaŭnych hrošaj, atrymanych u padarunak ad baćki.
Juryst Trampa Čarlz Charder vystupiŭ z zajavaj, u jakoj havorycca, što abvinavačvańni NYT «na 100% falšyvyja i źjaŭlajucca paklopam». Jon abvierh fakty machlarstva abo ŭchileńnia ad padatkaŭ, jakija apisvajucca ŭ materyjale hazety.
Pres-sakratar Biełaha doma Sara Sanders zajaviła, što artykuł «uvodzić čytačoŭ u zman». Jana dadała, što dziaržaŭnaja padatkovaja słužba ZŠA «šmat dziesiacihodździaŭ tamu razhledzieła i ŭchvaliła hetyja tranzakcyi».
Miž tym, padatkovaje ŭpraŭleńnie štatu Ńju-Jork zacikaviłasia infarmacyjaj, apublikavanaj New York Times, paviedamlaje telekanał ABC. Pa słovach ekspertaŭ u halinie padatkaabkładańnia, Tramp naŭrad ci zaznaje kryminalny pieraśled, pakolki mierkavanyja złačynstvy, u jakich jaho abvinavačvajuć, byli ździejśnienyja šmat hadoŭ tamu. Adnak prezydenta mohuć aštrafavać ci nakłaści inšyja vidy administracyjnych pakarańniaŭ, kali jaho vinu ŭdasca dakazać.
Kamientary