Pryznańnie na papularnym amierykanskim sajcie: ja «padsieła» na Biełaruś
Niekalki aptymistyčnych nazirańniaŭ pra našuju krainu i narod.
Maša Čarakova, aŭtarka knihi-biestsielera «Heta Biełaruś, dzietka», źmiaściła manifiest-pryznańnie ŭ lubovi da Biełarusi na sajcie BelarusFeed.com, jaki publikuje naviny pra našuju krainu pa-anhlijsku.
Mianie zavuć Maša Čarakova, i ja mušu zrabić pryznańnie: u mianie zaležnaść ad Biełarusi
Biełaruś — maja radzima, maja vialikaja luboŭ. Choć ja i vyrasła nie ŭ Biełarusi (maja siamja źjechała z krainy, kali mnie było vosiem hod), mnie pašancavała tut naradzicca. Paśla ŭniviersitetu ja vyrašyła viarnucca ŭ Minsk, kab adkryć hetuju krainu dla siabie, užo darosłaj.
Ja płanavała zastacca tut na paŭhoda, ale ŭ vyniku pražyła i adpracavała ŭ Biełarusi try hady. Paśla ja viarnułasia ŭ Niderłandy, kab hadavać dzicia z maim mužam-šviejcarcam.
Čytajcie taksama: Aŭtarka biestsielera «Heta Biełaruś, dzietka»: U Biełarusi ja znajšła kachańnie i natchnieńnie
Ale navat paśla hetaha ja praciahvała pracavać u Biełarusi, vandrujučy štomiesiac pamiž Amsterdamam i Minskam. Ja pracavała nad šmatlikimi prajektami — treninhami i mientarstvam nad sacyjalnymi pradprymalnikami, a taksama pisała knihi.
I ja dahetul praciahvaju štomiesiac heta rabić, bo biełarusy dajuć mnie takuju enierhiju i sens žyćcia, jakija ja nie zmahła nidzie bolš adšukać.
Paŭsiul talenty!
Vandroŭki ŭ Biełaruś natchnili Mašu na toje, kab stvaryć sieryju malunkaŭ-kałažaŭ pa minskich matyvach.
Kali ja pryjechała ŭ Biełaruś upieršyniu z časoŭ dziacinstva, to sustreła nievierahodnych ludziej. Śpiarša ja padumała, što, mabyć, mnie prosta pašancavała. Ale ja ŭsio praciahvała i praciahvała ich sustrakać.
U Biełarusi ja pabačyła tak šmat talenavitych ludziej — jany šyjuć vopratku, malujuć, zajmajucca vałanciorstvam ci biźniesam. Naprykład, mnie ŭrezałasia ŭ pamiać, jak ja išła pa handlovym centry razam ź biełaruskaj siabroŭkaj i pabačyła pryhožuju lampu. Jana skazała: «Ja mahu tabie zmajstravać takuju». I ździviłasia: «Praŭda?» Jana ž tady była ŭsiaho tolki studentkaj.
Praź miesiac jana padaravała mnie palepšanuju viersiju hetaj lampy. Vaŭ!
Ja zaŭvažyła, što biełarusy lubiać stvarać rečy ŭłasnymi rukami.
Paŭsiul mahčymaści!
A jašče mnie spadabałasia ŭ Biełarusi toje, kolki navokał mahčymaściaŭ dla taho, kab zrabić niešta pazityŭnaje ŭ vielmi mnohich śfierach.
Dyk heta ž śviedčańnie šmatlikich prablemaŭ, skažacie vy. Tak, na heta možna hladzieć jak na prablemy. Ale, mahčyma, maja padvojnaja nacyjanalnaja identyčnaść daje mnie mahčymaść zirnuć na rečy ź inšaj pierśpiektyvy, i tamu ja baču hetyja prablemy mienavita jak mahčymaści. Najbolšaj składanaściu dla mianie było vybrać tyja, nad jakimi mnie varta pačać pracavać u pieršuju čarhu: ja zrazumieła, što nie budu mieć dastatkova času na sto rečaŭ adrazu.
Ja vyrašyła sfakusavacca na tym, kab dać biełarusam instrumienty i viedy dla taho, kab palapšać ułasnaje žyćcio, a taksama žyćcio ludziej navokał. Voś čamu ja raźvivała i prapahandavała sacyjalnaje pradprymalnictva ŭ Biełarusi na praciahu piaci hod praz raznastajnyja adukacyjnyja prahramy.
Heta dało mnie mahčymaść spatkacca z mnohimi ludźmi, jakija dumajuć pa-pradprymalnicku.
Ja sustreła i dapamahła navučyć bolš za 1000 biełarusaŭ i biełarusak, jakija žadali štości źmianić u hetaj krainie, vykarystoŭvajučy madel sacyjalnaha biźniesu. I heta było prosta nievierahodna! Ja bačyła, jak jany prynosili idei pra toje, kab adčynić kaviarniu, dzie mahli b pracavać ludzi z abmiežavanymi mahčymaściami, ci stvarać vyjavy, jakija ślapyja mohuć pamacać rukami, ci arhanizoŭvać centry dla ludziej stałaha vieku.
Tak šmat idej, jakija byli pieratvoranyja ŭ prajekty ci sacyjalnyja biźniesy, jakija źmianili mnostva žyćciaŭ!
Pakazać biełarusam, jakaja cudoŭnaja ŭ ich kraina
Budzie vielmi ciažka adčuć siabie haspadarami i palepšyć choć što-niebudź, kali mnohija hramadzianie krainy nie viedajuć, kim jany jość, i nie ŭmiejuć napoŭnicu zrazumieć svoj patencyjał. Kab uśviadomić heta, bolšaści ludziej patrebna dać prykład, natchnić ich.
Kali ž navat tutejšyja ludzi hetaha nie bačać, to čaho čakać ad zamiežnikaŭ?
Samy čas dla biełarusaŭ pačać hanarycca tym, chto jany takija, ich kulturaj i historyjaj, a taksama — i heta samaje važnaje — svajoj budučyniaj.
Šanavać biełaruskuju ŭnikalnaść
Najbolš ja hanarusia prajektam «Heta Biełaruś, dzietka», jaki pakazvaje ŭnikalnaść Biełarusi praz knihi, a taksama HiFive Belarus — hidam pa krainie na anhlijskaj movie, jaki isnuje jak u anłajnie, tak i na papiery.
A jašče ja znajšła novy šlach dla hetaha — praz chobi. Ci viedajecie vy, jakaja bieźlič raznastajnych malunkaŭ, ilustracyjaŭ na temu Amsterdamu pradajecca na vulicach stalicy Niderłandaŭ? Heta natchniła mianie na toje, kab stvaryć sieryju ilustracyjaŭ na temu biełaruskaj stalicy.
Takim čynam, siabry, davajcie pačniem usłaŭlać Biełaruś! Lubym sposabam. Samy čas pakazać usiamu śvietu, jakaja cudoŭnaja ŭ nas kraina, i, asabliva, jaje ludzi.
U listapadzie Maša płanuje adčynić vystavu svaich malunkaŭ u minskaj kaviarni Beans and Leaves.
-
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli
-
Minsku treba vydušyć ź siabie pravincyjnaść i viarnuć nachabstva i blask Vialikaha Horada
-
Kamu jašče što moža stać treba «dla nacyjanalnaj biaśpieki» i jak tut być Biełarusi
Kamientary