«Nie dapamahajuć i navat łajucca». Čałaviek na invalidnaj kalascy nie moža prajechać u Horkach navat pa centry horada FOTY

Ci źjaŭlajucca Horki kamfortnymi dla tych, kamu koły zamianili nohi, horki.info pahavaryli z Halinaj Ciškovaj. U žančyny — invalidnaść pieršaj hrupy.

Pavialičyć

Akuratny pandus kančajecca abryvam

Halina razam z mužam Viktaram žyvie ŭ rajonie čyhunačnaha vakzała, za pierajezdam. Kožny pachod u palikliniku, kramu ci navat u centr sacyjalnaha absłuhoŭvańnia pieratvarajecca dla hetaj pary ŭ kvest ź pieraadoleńniem pieraškod.

Viktar Mikałajevič usiudy supravadžaje žonku — pra toje, kab jana mahła samastojna pabyvać navat u najbližejšaj kramie havorki niama. Maładaja žančyna nie ŭ siłach prypadniać svaju kalasku na tratuar.

— Kali b u mianie nie było muža, ja b siadzieła doma. U našym rajonie, dy i pa ŭsim horadzie, vulicy nie prystasavanyja, kab kalasačniki, jakich u nas šmat, samastojna pierasoŭvalisia. Amal usiudy jość bardziury, i kali jany vysokija, kalaska moža pierakulicca, — tłumačyć Halina Mikałajeŭna.

Niekalki hadoŭ tamu siamja zmahła damahčysia, kab kamunalnyja słužby Horak prakłali darožku ad padjezda ich doma da chlava. Ciapier u suchoje nadvorje Halina moža chacia b tudy dabracca samastojna.

Pavialičyć

Pa słovach žančyny, dzie-nidzie ŭ horadzie pandusy i źjezdy abstalavany častkova. Pa alei, jakaja viadzie da chlebazavoda, na pieršy pohlad usio zroblena, jak maje być. Ale pasprabujcie prajechać tam u invalidnaj kalascy ci chacia b na rovary. Akuratny, pad pravilnym vuhłom ustanoŭleny pandus niečakana kančajecca sapraŭdnym abryvam. Z rovara možna saskočyć, a ź invalidnaj kalaski?

Nie dapamahajuć i navat łajucca

Jość składanaści i z hramadskim transpartam.

— Ja byvaju ŭ inšych haradach. U Mahilovie i Minsku kiroŭcy zaŭsiody pytajucca, ci treba dapamahčy, navat kali ŭ čałavieka z abmiežavanymi mahčymaściami zdaroŭja jość supravadžalnik. U nas ža naadvarot, kiroŭcy časam pačynajuć aburacca, kali bačać, što kalasačnik źbirajecca ŭvajści ŭ sałon, navat łajucca. Jość prablemy i z vysadkaj. Na niekatorych prypynkach vuhał padjezda da tratuara abstalavany tak, što aŭtobus nie moža pryparkavacca blizka. U hetym vypadku kalasku razam sa mnoj davodzicca vynosić na rukach, — kaža surazmoŭca.

— Čamu dla nas stolki pieraškod? Bo my całkam narmalnyja ludzi, takija ž, jak i astatnija. I taksama aktyŭna chočam žyć. Naprykład, hady dva tamu ja čatyry miesiacy vučyłasia na kursach u stalicy. I jašče b pajechała, kali b vypała takaja mahčymaść, — dzielicca pieražyvańniami Halina Ciškova.

Pavialičyć

U pryvatnyja maršrutki dostup takim, jak jana, zakryty, navat kali jość supravadžalnik — kalaska nie moža narmalna raźmiaścicca ŭ sałonie, nie chapaje miesca. Pasłuhami taksi jany karystajucca redka, tolki kali vielmi terminova. Dla siamiejnaha biudžetu doraha, dy i nie ŭsie pieravozčyki biaruć takoha pasažyra.

— Pa horadzie ŭsiaho adzin-dva taksisty, jakija zhadžajucca nas vazić. Časam byvaje, što i źnižku robiać za prajezd. Kali dla zvyčajnaha čałavieka pajezdka pa horadzie kaštuje piać rubloŭ, to dla vazočnika — try. Dziakuj im za heta, — kaža Viktar Mikałajevič.

Muž i žonka chočuć, kab usie damy i padjezdy, dzie ŭ Horkach pražyvajuć ludzi z parušeńniami aporna-ruchalnaha aparata, byli abstalavany zručnymi pandusami i padjomnikami. Uvachody ŭ budynki administracyjnaha i kulturnaha pryznačeńnia, a taksama kramy byli b uładkavany tak, kab kalasačnik moh patrapić unutr biez starońniaj dapamohi. Usie spuski-ŭzdymy na vulicach byli b płaŭnymi.

Niama ŭmoŭ i kalaska ciažkaja

Pavodle Alaksandra Bujdziankova, zahadčyka adździaleńnia terminovaha sacyjalnaha absłuhoŭvańnia nasielnictva, u Horackim rajonie — 168 čałaviek, jakija vykarystoŭvajuć invalidnuju kalasku. Ź ich tolki adzinki samastojna vyjazdžajuć na vulicu. U asnoŭnym ich intaresy pradstaŭlajuć svajaki, jany ž pryjazdžajuć u centr sacabarony, kab atrymać «transpart».

— Sustreć na vulicy čałavieka ŭ invalidnym kreśle i biez supravadžeńnia amal nierealna. U hetaj akaličnaści dźvie asnoŭnyja pryčyny — adsutnaść biezbarjernaha asiarodździa i ciažkija, niazručnyja ŭ vykarystańni kalaski.

Pavialičyć

• 0
• 0
• 0
• 0
• 0
• 0
• 0
• 0