Ratavalnik, jakomu nachamiŭ błohier Filipovič: Adpracavali 14 hadzin jak čerci, a tut jašče jon
Pamiatajecie pažarnaha sa skandalnaha videa homielskaha błohiera Maksima Filipoviča? Čałaviek, jakomu chamiŭ błohier i na abaronu jakoha stali haradžanie, — namieśnik načalnika abłasnoha ŭpraŭleńnia MNS Siarhiej Novik. U tuju noč jon razam sa svaimi padnačalenymi hasiŭ surjozny pažar. Tut.by spytaŭ pałkoŭnika, dzie jaho navučyli takoj vytrymcy i jakija pačućci zastalisia paśla niepryhožaha incydentu.
Nahadajem, u aŭtorak na pradpryjemstvie PSUP «Linija znosu» ŭ Homieli adbyŭsia pažar. Pažar byŭ składany, tušyli ŭvieś dzień i noč. Svaju videaspravazdaču vyrašyŭ padrychtavać i homielski błohier Maksim Filipovič. Niejki čas jon zdymaŭ na videa zdareńnie z akna svajoj kvatery, ale paźniej vyrašyŭ vysunucca na miesca nadzvyčajnaha zdareńnia. Na terytoryi, dzie ratavalniki ŭžo nie pieršuju hadzinu zmahalisia z ahniom, da Filipoviča padyšoŭ supracoŭnik MNS, kab vyśvietlić, što nieviadomy čałaviek robić u niebiaśpiečnaj zonie — i pačuŭ u svoj adras mnostva abraźlivych słoŭ. Pry hetym u roliku bačna, što supracoŭnik usialak imkniecca nie abvastrać i biez taho napružanuju abstanoŭku, a voś ton razmovy błohiera z ratavalnikam — adkryta niepavažlivy i zadzirlivy.
Karystalniki stvaryli pietycyju na adras UUS Homielskaha abłvykankama z prośbaj pryciahnuć jaho da kryminalnaj adkaznaści za abrazu. Jaje padpisali 1383 čałavieki.
— Siarhiej Leanidavič, jak vam takaja papularnaść?
— I nie kažycie, — śmiajecca. — Siabry i znajomyja abarvali telefon.
— Što kažuć?
— Toje ž, što ŭ vas na forumie pišuć. A tyja, chto viedaje mianie bližej, ździŭlajucca.
— Vašaj vytrymcy?
— Nu tak. Było vielmi składana. Ja ž u pieršuju čarhu mužyk. Adpracavali jak čerci 14 hadzin, stamilisia, a tut jašče jon. Kali lješ vadu ŭ ačah pažaru, idzie padsmoktvańnie kisłarodu — i tam takija kanviektyŭnyja patoki, što struja vady ŭ niekatorych momantach lacić nie ŭ ačah, a jak by zakručvajecca. Naturalna, ablivaje bajcoŭ, usie byli mokryja. Pobač z ačahom ciopła i navat horača, ale varta adyści — zamiarzaje momantam, a tabie treba raźbirać, pralivać, ciahać rukavy. I voś, ujavicie, u hety momant da vas padychodziać i prosiać nazvacca. Ale ja razumieŭ, što adzin niapravilny ruch — i ŭsio pavierniecca suprać mianie ž. Zrazumieła, što ŭnutry ŭsio kipieła i chaciełasia zrabić toje, pra što ŭsie ciapier kažuć. Ale žyćcio ŭsio rasstavić na svaje miescy.
— Taki surjozny byŭ pažar? Čamu tak doŭha nie mahli ź im spravicca?
— Hałoŭnaja składanaść była ŭ adsutnaści vady. Na terytoryi dva nievialikija voziery, ale vypampavali ich vielmi chutka. Davodziłasia brać vadu ŭ rajonie radyjozavoda, na Barykina, pryciahvać šmat techniki. Zachoŭvałasia na pradpryjemstvie ŭsio aburalna, biez supraćpažarnych razryvaŭ — i heta fakt. Kali b usio było pa praviłach, takoha pažaru b nie zdaryłasia. Uzharańnie było ŭ samym centry hetaj zdaraviennaj kučy. Ljom-ljom, vada raściakajecca pa biarvionach, a ŭ sam ačah nie dachodzić. Vylili niejmaviernuju kolkaść vady, a haryć. Užo pryjšłosia achoŭvać susiednija štabieli i navat budynki.
— Mnohija ździvilisia, što hieroj z rolika akazaŭsia cełym pałkoŭnikam…
— I što?
— Nu pałkoŭniki — jany ž u kabinietach …
— Možna i tak. Ale nie pryvyk niejak! Mnie padabajecca maja praca, mahu skazać, što ja navat fanat. A možna ja praz vas padziakuju ŭsim bajcam, jakija ŭdzielničali ŭ likvidacyi hetaha pažaru? Jany vialikija małajcy!
Kamientary