Misija vykanalnaja: padbirajem razam sa stylistkaj ciopłyja zimovyja łuki, u jakich vy nie budziecie padobnyja da kapusty FOTY
Razam z fešn-błohierkaj i stylistkaj Taćcianaj Ščarbakovaj adpravilisia ŭ kramu Reserved, što ŭ «Halerei», i na praktycy razabrali paru modnych łajfchakaŭ, jakija dapamohuć apranacca zimoj ciopła i pry hetym nie vyhladać jak miašok.
Taćciana:
— Hałoŭnyja pryncypy, jakich ja prytrymlivajusia, kali padbiraju harderob zimoj, — nabyvać vopratku i švedry z salidnym pracentam šerści i kašamiru ŭ składzie, bo tolki takija rečy sapraŭdy hrejuć. Druhaja parada — nadziavać jak maha bolš słajoŭ na siabie: spačatku vadałazku, naprykład (lepš, kali jana taksama budzie z naturalnymi składnikami), paśla — kašulu z toŭstaj bavoŭny ci skuranuju, džynsy. Navierch — puchavik, palito ci šuba, u zaležnaści ad taho, što vy lubicie i jakija ŭ vas zadačy na dzień: tut treba ŭličvać, kolki času vy praviedziacie na vulicy i jakim čynam budziecie pierasoŭvacca — na hramadskim transparcie ci na ŭłasnym.
Nichto nie admianiaŭ termabializinu i toŭstyja kałhotki pad štany ci džynsy (zimoj ja mała chadžu ŭ sukienkach i spadnicach, usio ž u nahavicach ciaplej). Usio — u imia zdaroŭja. Na svoj nievialiki rost ja ŭvohule kupiła termabializnu ŭ dziciačym adździele «Mark Farmel».
Šapki ŭzimku, kaniečnie, sapsujuć pryčoski, ale bieź ich nikudy. Kali ja viedaju, što mnie nie treba budzie prysutničać na niejkim mierapryjemstvie ŭ pamiaškańni, to svabodna chadžu ŭ kłasičnaj šapcy-bini, a-la mužčynskaja. Kali ž na vulicy vielmi chaładno i viecier, ale pry hetym treba, kab vałasy mocna nie prymialisia, možna zaviazać na hałavu šarścianuju chustku.
Ciapier, darečy, u jakaści hałaŭnych uboraŭ vielmi modnyja bałakłavy. U biełaruskich kramach ich pakul što niama, bo da nas usie trendy dachodziać tolki tady, kali stanoviacca bolš masavymi.
Praŭda, kab nasić taki aksesuar, jak i luby inšy trend, treba vałodać pačućciom hustu i stylu. Viedajecie, byvaje takoje, što čałaviek načapiŭ na siabie ŭsio samaje modnaje, a vyhladaje śmiešna. Usio heta tamu, što jon nie nadaje ŭvahi detalam.
A ciapier padbiarom niekalki ciopłych łukaŭ z taho, što prapanoŭvaje krama Reserved (miž inšym, mnohija rečy tam zaraz na źnižkach).
Łuk № 1
Jak bačycie, ja sabrała ŭsie bazavyja rečy. Padobnaje padoŭžanaje bežavaje palito z pramym krojem, na moj pohlad, pavinna być u harderobie kožnaj dziaŭčyny. U składzie hetaha — 50 pracentaŭ šerści, tamu ŭ im sapraŭdy ciopła.
Pad niz kašamiravaha švedra ja nadzieła svabodnuju biełuju futbołku z mužčynskaha adździeła, jaje kraj robić vobraz nie takim płoskim.
U jakaści nizu vybrała šeryja spartyŭnyja štany, heta hladzicca kudy bolš aryhinalna, čym kali b na ich miescy byli zvyčajnyja džynsy. Uvohule, ja lublu spałučać sport i šyk. Kab kančatkova nie syści ŭ pieršaje, razbaŭlajem vobraz abutkam na ŭstojlivych abcasach. U takich rečach možna pajści jak na pracu, tak i na niejkuju viečarynu.
Źviarnicie ŭvahu, jak tut spałučajucca kolery i tekstury. Achramatyčnyja šery, čorny i bieły dapoŭnienyja niezvyčajnym šalikam. Vierch u nas hładki, niz — bolš hruby, abutak paŭtaraje krakadziłavuju skuru — takoje spałučeńnie roznych tekstur robić łuk cikavym i šmatsłojnym.
Łuk № 2
U hetym vobrazie znoŭ prysutničaje niezamiennaja zimoj šmatsłojnaść. Hałoŭnaja parada ŭ składańni čaho-niebudź padobnaha — nie bajacca brać rečy bolšych pamieraŭ. Ja našu 34 pamier, pry hetym spakojna ŭziała džynsy-bojfrendy 40-ha i kasuchu — 42-ha. Kali b kurtka była mnie pa fihury, to ŭsio, što źnizu, niepryhoža b źbirałasia i paŭzło navierch.
Łuk № 3
U dadzienym vobrazie sukienka hraje rolu spadnicy. Kali vy baiciesia takich biasformiennych łukaŭ, možna padpierazacca remieniem. Praŭda, z maim pramavuholnym typam fihury, kali ja zrablu akcent na talii, to jašče bolš padkreślu, što jaje niama. Tamu tut treba być aściarožnymi i padychodzić da kožnaha typu fihury indyvidualna.
Pad niz zastajecca tolki nadzieć šakaładnyja kałhotki, krychu ciamniejšyja za sukienku. Nijakaha kapronu — na moj pohlad, ź zimovymi botami heta navat niepryhoža. Toŭstyja ž kałhotki vyciahnuć uvieś vobraz i padoŭžać nahu.
Na hałavu siudy b ja dadała zvyčajnuju šeruju šapku (biez pamponaŭ — pakińcie takija madeli dziaŭčynkam da 10 hod). Siudy b padyšła i bałakłava: ja b abrała całkam čornuju, kab jana praciahnuła puchavik.
Što tyčycca palčatak, to ja raju spyniacca na kłasicy: šerych, čornych i biełych — jany padychodziać amal da ŭsiaho. A da lubimaha biełarusami ŭzimku čornaha koleru — dyk dakładna. Kali chočacca čahości niezvyčajnaha, dadać niejki akcent, to možna nabyć palčatki smarahdavaha koleru, karamielnaha ci bardo — jany vyhladajuć doraha.
Kamientary