Sieviaryniec: Łukašenku treba razarvać damovy z Rasijaj i zaprasić dobraachvotnikaŭ z Ukrainy
Za apošnija piać hadoŭ mnie daviałosia dziasiatki razoŭ čuć ad svaich siabroŭ, paplečnikaŭ, palitykaŭ, dypłamataŭ: akramia Łukašenki, u Biełarusi nie zastałosia pieraškodaŭ dla kramloŭskaha anšlusa. Ciapier hetaja chvala dasiahnuła piku.
Toje, što hety režym sam z dapamohaj Kramla 25 hadoŭ rasstaŭlaŭ pastku dla niezaležnaści, zabivaŭ i kidaŭ u turmy lepšych biełarusaŭ, niščyŭ movu, kulturu i parastki hramadzianskaj supolnaści, razburaŭ ekanomiku, rabavaŭ narod, prajadaŭ i raskradaŭ naftahazavuju chalavu, ciapier nie biarecca ŭ raźlik.
Maŭlaŭ, Łukašenka narešcie «prazreŭ» i staŭ niezaležnikam. Dziaržyś, značyć, Ryhoryč, nie zdavaj nas.
Dobra. Hatovy pryniać taki pavarot. Tolki pry ŭmovie, što «harant» pryniasie płod, varty pakajańnia.
— Vystupić sa zvarotam, dzie ščyra skaža: prabačcie, ludzi, 25 hadoŭ vioŭ vas nie tudy — kab usie, narešcie, zrazumieli, kudy my idziem.
— Skasuje ŭsie kabalnyja damovy z Rasijaj — bo navat jahony ŭrad uhołas kaža, što heta kabała.
— Admienić duracki «padatak na darmajedstva», kantraktnuju sistemu, skaračeńni piensijnaha stažu — kab viarnuć davier biełarusaŭ da dziaržavy. Ludzi nie buduć abaraniać dziaržavu, jakaja ich dušyć.
— Vypuścić palitviaźniaŭ.
— Padymie bieł-čyrvona-bieły ściah.
— Adčynić Biełaruski nacyjanalny univiersitet
— Pierakryje kanały rasijskaj prapahandy i lehalizuje «Biełsat», «Chartyju», «Racyju».
— Padrychtujecca apłacić poŭnuju canu za haz albo kuplać i vieźci enerhanośbity ź inšych rynkaŭ.
— Zaprosić biełaruskich dabraachvotnikaŭ va Ŭkrainie ŭznačalić vojska, hatovaje abaraniać krainu ad krymskaha i danbaskaha scenaru.
— Admienić abmiežavańni dla drobnaha i siaredniaha biźniesu.
— I narešcie abvieścić volnyja vybary, u jakich nia budzie prymać udzieł sam.
Vy vierycie ŭ takija dziejańni «haranta niezaležnaści»? Navat kali Maskva pastavić ultymatum i zapuścić tajmier?
Kali nie — para pryznać: niama nijakich harantaŭ biełaruskaj niezaležnaści, akramia Boha i biełaruskaha naroda. Jak pakazała Ŭkraina, navat «Budapiešcki miemarandum» ničoha nie harantuje.
Łukašenka moža vykanać rolu časovaj zahłuški. Ale vyrašać, ci być Biełarusi volnaj i niezaležnaj — nam. Nie ź jaho spytajucca potym. Z nas.
Tamu: treba rychtavacca brać adkaznaść za krainu samim.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ3
Kamientary