Načosy, bodzi i jarki makijaž — u modzie znoŭ jarkija 80-ja. Što dastać z maminaj šafy, kab być u trendzie?
Tuha pa zmročnaj estetycy 90-ch bolš nie ŭ modzie — vizažysty, stylisty, majstry pa pryčoskach i fatohrafy pa ŭsim śviecie ciapier aktyŭna ŭspaminajuć jarkija 80-ja! Nastalhija pa časach maładości našych mam — trend, jaki nabiraje abaroty z kaśmičnaj chutkaściu.
Naša aŭtarka Łada Bałakirava raspaviadaje, na što varta źviarnuć uvahu, kab być u temie.
Pryčoski
Apantanyja načosy, bujnyja kučary, malet, pyšnyja čubki i hafre viartajucca! U 80-ja žančyny nie zadumvalisia nad tym, ci škodziać vałasam raznastajnyja ŭkładki, piermanient i biaskoncyja słai łaku — kali vaša pryčoska nie padobnaja da abłačynki, vy niešta robicie nie tak.
Znoŭ u modzie aksesuary dla vałasoŭ, asabliva ŭsie vidy paviazak, chustak, bantaŭ i abručoŭ, a taksama abjomnyja humki (čym jarčejšyja, tym lepšyja).
Kim natchniacca: Džaana Džeta, Kim Biejsindžer, Bruk Šyłds.
Makijaž
Zabyvajemsia pra naturalnaść i praviły rabić akcent na niešta adno — prosta biarom usio lepšaje adrazu! Błakitnyja abo fijaletavyja cieni na ŭsioj płoščy pavieka, rastušavanyja ŭ šyrokaje nieapracavanaje bryvo (u SSSR brovy ŭ hety čas, naadvarot, nasili tonkimi duhami — pahladzicie na hieraiń taho ž «Słužbovaha ramana») byli na piku papularnaści. Makijaž vačej taksama nie abychodziŭsia biez zanadta nafarbavanych viejek. Našy mamy lubili (za adsutnaściu alternatyvy) komba ź ihołački dla raździaleńnia i «Leninhradskaj» tušy. Na tvar, akramia ščylnaha tonu i biełaj pudry, nanosiłasia vielizarnaja kolkaść jarka-ružovych, karałavych abo ślivovych rumian (hetaja technika atrymała nazvu «drejpinh» i rehularna viartajecca ŭ modu kožnyja paru hadoŭ). I, narešcie, vusny — na ich mažam kidkuju pierłamutravuju pamadu. Bam — i atrymlivajecca dyska-dziva!
Kim natchniacca: Hrejs Džons, Madonna, Iryna Alehrava.
Adzieńnie
80-ja — adna z samych ekśpierymientalnych epoch sučasnaści, što ŭ pieršuju čarhu adbiłasia na vopratcy. Kožny ŭbor byŭ zajavaj, a to i krykam, stylaŭ isnavała vialikaje mnostva. Naprykład, kult idealnaha atletyčnyja cieła i rost papularnaści madelaŭ jak influensieraŭ abumoŭlivaŭ raspaŭsiudžanaść spartyŭnych rečaŭ: łajkra, bodzi, holfy — usio takoje. Ź inšaha boku, usie hublali hałavu ad džynsovak-oviersajz, ahresiŭnych skuranych kurtak i štanoŭ, a taksama futbołak z nadpisami roznaj stupieni iraničnaści, mnohija tahačasnyja ikony stylu i siońnia nie zdajuć pazicyj (Depeche Mode, naprykład). Žanockija i seksualnyja sukienki-kambinacyi, jak na hieraini Mišel Pfajfier u kultavym «Čałavieku sa šnaram», taksama niaźmienna rabili furor.
Tym nie mienš apisać modu 80-ch adnym słovam usio ž možna: plečy. Reč ličyłasia supiermodnaj pry najaŭnaści vialikich padplečnikaŭ, niachaj heta budzie kurtka, pinžak ci sukienku, asablivym šykam było zaciahnuć na talii remień, kab dadatkova ŭzmacnić kantrast.
Siońnia ŭ kaściumach, natchnionych 80-mi, achvotna farsiać milenijały — a Kim Kardašjan navat dumaje, što jana pieršaja prydumała vychodzić u ludzi ŭ viełasipiednych łasinach.
Miedyja
Što ahulnaha pamiž takimi roznymi stužkami, jak «Vielmi dziŭnyja spravy» i «Tor: Rahnarok»? Viadoma ž, znoŭ niezabyŭnyja 80-ja, jakija natchnili stvaralnikaŭ! Za hihantami kštałtu Netflix paciahnulisia i ŭsie astatnija — naprykład, u minułym hodzie šmatlikija fatohrafy i apieratary źniali svojeasablivyja trybjuty naiŭnych i śmiešnych partretaŭ z vypusknych albomaŭ (asabliva papularnyja ŭ Amierycy) ci «Błakitnych ahieńčykaŭ» (na postsavieckaj prastory). Toje ž datyčycca i muzykaŭ — upłyŭ 80-ch na tvorčaść niekatorych maładych vykanaŭcaŭ vielmi vyrazny (naprykład, Bruna Mars abo Grimes).
Zdajecca, samy čas zrabić mahnitafon hučniej i jak śled pakapacca ŭ maminaj šafie ŭ pošukach aŭtentyčnych rečaŭ!
Kim natchniacca: «Terminatar», «Palaŭničyja na pryvidaŭ», «Samaja abajalnaja i pryvabnaja».
Prahnazujem, što hety trend pratrymajecca jašče paru hadoŭ, bo čas va ŭsim śviecie sapraŭdy byŭ cikavy, choć i niaprosty. A vam simpatyčny styl 80-ch?
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?9
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Kamientary