«Usie biełaruskamoŭnyja — heta naša radnia»: jak patryjotka viadzie biźnies na vioscy VIDEA
Prahrama «Viaskoŭcy» telekanała «Biełsat» paznajomiłasia ź viaskovaj biźnies-łedzi i navučyłasia rabić klocki z dušami.
Spadarynia Julija Buka ź vioski Vałodźkava Hłybockaha rajonu vykupiła razam z supolnikami niekalki chat u svaim rodnym sieliščy i stvaryła ahrasiadzibu «Rodny kraj».
Šmat chto z naviednikaŭ pryvozić siudy svaich dziaciej, kab jany pačuli biełaruskuju movu ŭ naturalnym asiarodździ.
«Dla biełaruskamoŭnych haściej my robim źnižku ŭ 20%. Ja liču, što ŭsie biełaruskamoŭnyja — heta naša radnia. Nas tak mała. Tamu nam treba padtrymlivać adno adnaho», — kaža spadarynia Julija.
Haspadynia ahrasiadziby padkreślivaje, što prytułak u jaje moža znajści kožny biełaruskamoŭny čałaviek, jaki trapiŭ u biadu i jakomu niama kudy padziecca. «Kali ty ščyry biełarus, ale pa-biełarusku drenna razmaŭlaješ — usio roŭna možaš da nas pryjechać», — adznačaje žycharka Vałodźkava.
Spadarynia Julija kormić haściej raznastajnymi miascovymi stravami. Adna ź cikavinak — heta sup z baćvińnia.
Niekali za luboŭ da baćvińnia našych prodkaŭ susiedzi navat nazyvali «baćvińnikami». Praŭda, haściej ź niekatorych rehijonaŭ heta vielmi ździŭlaje, bo, jak kažuć, baćvińnie ŭ ich dajuć tolki na korm žyviole.
Viadoŭca prahramy «Viaskoŭcy» Viktar Šukiełovič razam sa spadaryniaj Julijaj pryhatavaŭ inšuju tradycyjnuju stravu — «klocki z dušami». Hety pačastunak niekali vielmi ŭraziŭ haściej z Rasiei, jakija vyjeli tolki miasnuju «dušu», pakinuŭšy bulbianuju abałonku.
Časam zdarajucca paradaksalnyja vypadki, pryznajecca spadarynia Julija, kali ŭletku da jaje pryjazdžajuć haradžanie i prosiać: «Vy tam zanadta ničoha nie rychtujcie. Chopić palcam pchanaj kiłbasy i kvašanaj kapusty».
Nasamreč u vioscy kiłbasu rychtujuć tolki ŭzimku, kali koluć parsiučka. Na zimu kvasiać taksama i kapustu, jakaja da leta źjadajecca.
Prahramu «Viaskoŭcy» hladzicie kožnuju sieradu a 18:35 na telekanale «Biełsat» praz spadarožnik «Astra 4A» (raniejšaja nazva «Sirius 4»), anłajn abo ŭ zakładcy «Prahramy» na staroncy telekanała. Abo sačycie ŭ Facebook.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii33
Kamientary