Žančyna admoviłasia ad niemaŭlaci ź sindromam Daŭna, nie žadaje płacić alimienty i abiacaje padać na daktaroŭ u sud

Ščyra pahavaryć na niaprostuju temu my pryjechali ŭ Žłobin. U kvatery 32-hadovaj Iryny (imia źmieniena — red.) hučna pracuje televizar. Žančyna prosić nie vyklučać jaho — raptam niechta z susiedziaŭ pačuje našu razmovu i daviedajecca pra hetu historyju. Kaleham, jakija razumiejuć, što ŭ siamji niešta zdaryłasia (paśla ciažarnaści Iryna adrazu viarnułasia na pracu), jana skazała koratka: «Dziciaci niama», i paprasiła bolš ničoha nie pytacca.

— Nie chaču, kab mianie ličyli katam. Kab zabyć heta ŭsio jak strašny son, — paŭtaraje Iryna. Žančyna nie moža tołkam sabracca z dumkami, choć źniešnie i spakojnaja. Pobač ź joj usie hetyja miesiacy siastra, jakaja śćviardžaje: spakoj Iryny — vynik šoku, ad jakoha jana nie adyšła dahetul.

— Ja časam kažu za Irynu, navat u sudzie dapamahaju joj vykazacca, — kaža siastra. — Jana ŭstaje, pramaŭlaje paru fraz — i bolš nie moža. Kab rastłumačyć sudździ svaju pazicyju, čytaje z arkuša. Doma pačała zahavorvacca. Płača i pastajanna prakručvaje hetu historyju ŭ hałavie.

— U nas užo jość syn, zdarovy. Ale my maryli jašče i pra dačku, — ledź strymlivajučy dryžyki ŭ hołasie, ściskajučy kułaki, kaža Iryna. — Zaciažaryła. UHD pakazała dziaŭčynku. Ščaściu nie było miažy. Svoječasova ŭstała na ŭlik, zdavała ŭsie analizy. Syn słuchaŭ, jak siastryčka bjecca nožkami ŭ žyvociku, nie moh dačakacca jaje naradžeńnia. My prydumali dačce imia, kupili kanviercik dla vypiski…

Pavialičyć

— Kali vy daviedalisia, što ź dziciem niešta nie tak?

— Na adnym z płanavych UHD, na 33-m tydni ciažarnaści, lekar skazaŭ, što ŭ dziciaci nie aparažniajecca mačavy puzyr. Adpravili ŭ Homielskuju abłasnuju balnicu. Tam UHD pakazała, što ŭ dziciaci niepraparcyjnaja hałava i tułava, ale skazali, što pry pravilnym lačeńni situacyju možna papravić, pryznačyli karekcirovačnaje lačeńnie. U dyjahnazie fihuravali «zatrymka ŭnutryčeraŭnaha raźvićcia płoda, parušeńni ŭ sistemie maci-płacenta-płod, kali dzicia niedaatrymlivaje pažyŭnyja rečyvy i kisłarod, parušeńnie matkava-płacentarnaha krovazvarotu. Viarnułasia ŭ Žłobin, pralažała amal dva tydni ŭ balnicy i vyjšła ŭžo biez dyjahnazu FPK. Praz dva dni na ahladzie ŭ žanočaj kansultacyi lekar skazała, što ŭ mianie tonus matki, i znoŭ adpraviła ŭ balnicu. 21 vieraśnia čarhovaje KTH vydała vynik: praviercie sercabićcio dziciaci. Lekary zamitusilisia i vyrašyli terminova rabić kiesarava siačeńnie. Majo dzicia naradziłasia na 38-m tydni. A kali mnie jaho prynieśli…

Pavialičyć

Žančyna zmaŭkaje, jaje dušać ślozy. Sabraŭšysia z ducham, praciahvaje:

— …Lekar praciahnuła mnie dačku sa słovami: «Vaša dziaŭčynka ź vidavočnymi prykmietami sindromu Daŭna». Moj rozum nie prymaŭ toje, što jany kazali. Pierapytała jašče raz, a kali lekar skončyła havaryć, praciahnuła im dačku sa słovami: «Zabiarycie». Ja navat nie zmahła trymać jaje na rukach…

Na maje pytańni, jak heta zachvorvańnie naohuł mahło zastacca niezaŭvažanym na praciahu ŭsioj ciažarnaści, lekary adkazvali: «My sami ŭ šoku, nie razumiejem, jak takoje mahło adbycca». Potym pryjšła vykonvajučaja abaviazki zahadčycy radzilnaha doma. Kazała, što heta surjoznaje PP, što analizujecca maja abmiennaja karta, što heta niedahlad na rańniaj stadyi ciažarnaści…

— A jak muž adreahavaŭ?

— Muž i śviakroŭ płakali. Jany tak ža, jak i ja, byli ŭ šoku i nie mahli pryniać takoje dzicia.

— I vy vyrašyli ad jaho admovicca?

— Praz paru dzion mianie spytali: «Vam jaje prynieści?» Ja admoviłasia. Uvieś čas pytałasia: «Moža, vy pamylilisia?» Lekar stała pieraličvać prykmiety sindromu Daŭna, jakija jość u dački: na ručcy typovaja dla sindromu Daŭna pałoska, miezieny palec skryŭleny, adlehłaść pamiž pieršym i druhim palcam na nožcy nie adpaviadaje normam, kropki Brušvielda (śvietłyja ŭkrapvańni na vačach), kasavokaść… Ja bajałasia ŭbačyć toje, pra što kazali daktyry. Pa viečarach niekalki razoŭ prychodziła na jaje pahladzieć. Pamiataju, jak jana lažała ŭ boksie. U jaje soska vypała. Ja jaje ŭstaviła joj u ratok… Sfatahrafavała, potym hladzieła na fota i płakała ŭ pałacie. Nie vytrymała i vydaliła. Zanadta baluča. Da mianie dasłali psichijatra. Jana spytała: «Jak vy siabie adčuvajecie?» Zmahła adkazać tolki: «A jak by vy siabie adčuvali na maim miescy?» Kali lekary daviedalisia pra toje, što ja źbirajusia napisać admovu, prasili nie śpiašacca z rašeńniem. Spadziavalisia, što pieradumaju.

Za dzień da vypiski z radzilni Iryna napisała admovu ad dziciaci.

«U vačach navakolla ja biesčałaviečnaja istota, ale majo žyćcio złamanaje»

— Adna z hałoŭnych daktaroŭ skazała: «Nie viedaju, jak sama by pastupiła na vašym miescy. Za luboje vašaje rašeńnie vas nichto nie asudzić. Heta vaša prava». Vyklikali supracoŭnikaŭ orhanaŭ apieki. Pačała zapaŭniać admovu. Tam była hrafa pra zhodu na ŭdačareńnie dziciaci. Mianie papiaredzili: «Kali padpisvajecie — stanoviciesia abaviazanaj asobaj i płacicie alimienty da 18 hadoŭ». Ja nie stała ničoha padpisvać.

Paźniej dzicia pavieźli ŭ Homielskuju abłasnuju balnicu, dzie paćvierdzili dyjahnaz. Kali zabirali miedyka-hienietyčnaje zaklučeńnie, pytalisia hienietykaŭ, čamu skryninh, jaki ja rabiła da 13 tydniaŭ, ničoha nie pakazaŭ? Jon ža i nakiravany na vyjaŭleńnie hetych prablem, kab u žančyny byŭ vybar, zachoŭvać dzicia ci nie. Nam adkazali: «Heta pryroda, takoje byvaje. Skryninh nie zaŭsiody infarmatyŭny».

Pavialičyć

Orhany apieki stali šukać pryjomnych baćkoŭ.

— Kali pary, jakija hatovyja ŭdačaryć dzicia ŭ Žłobinie, daviedvalisia pra dyjahnaz, adrazu admaŭlalisia. Supracoŭniki orhanaŭ apieki kazali: «Vy dumajecie tolki pra siabie. Vy ž maci, heta vaša dzicia». Ale my hetaje dzicia pryniać nie možam…

Dalej byli sudy.

— Niadaŭna nas z mužam pazbavili baćkoŭskich pravoŭ u adnosinach da novanarodžanaj dački. Na sudzie prysutničała pažyłaja žančyna ź invalidnaściu, jakaja ŭziała dzicia pad apieku. Na sudzie jana kazała: «Dziaŭčynka dobraja, dziaŭčynka zdarovaja, dziaŭčynka pryhožaja». Na nastupnym sudzie budzie vyrašacca pytańnie ab pryznańni nas abaviazanymi asobami pa ŭtrymańni dziciaci. Apieka kaža: «Rychtujciesia płacić 255 rubloŭ». Heta amal usia maja zarpłata. A jašče my płacim kredyt za kvateru — 210 rubloŭ kožny miesiac, plus kamunalnyja — 78 rubloŭ, sadok — 70…

— Ale kali b dzicia było zdarovaje, na jaho taksama treba było b tracić hrošy.

— Tak, i ja chaču jašče dzicia. Ale zdarovaje. U tym, što ja stała maci chvoraha dziciaci, vinavatyja lekary. Kali b na rańnich stadyjach ciažarnaści ja daviedałasia, što ŭ dziciaci sindrom Daŭna, ja b zrabiła abort. Ja b nie abciažarvała ni siabie, ni dziaržavu. Mnohija nazavuć mianie žorstkaj, ale, pierš čym mianie sudzić, treba zaleźci ŭ maju škuru. Vychoŭvać chvoraje dzicia — biaskoncaja muka. Muž adydzie na druhi płan, zdarovaje dzicia — taksama. Pryjdziecca syści z pracy. Ja bačyła, jak da takich dziaciej staviacca ŭ hramadstvie, bačyła niaščasnych mam hetych dziaciej. Ja b nie zmahła vyjści z hetaj dziaŭčynkaj navat u dvor. Spasłacca na pryrodu, jak heta robiać lekary, možna było hadoŭ 20 tamu, kali nie było narmalnych technałohij. Ale nie ŭ XXI stahodździ. Čamu ludzi pavinny pakutavać?

— U vas jość žadańnie bačyć dzicia?

— Nie, nie chaču bačyć, čuć i viedać. U hetaj situacyi my zastalisia adny. Miedyki razvodziać rukami. Orhany apieki vinavaciać. My šukajem piśmiennaha jurysta, źbirajemsia źviartacca ŭ Viarchoŭny sud. Užo źviartalisia ŭ parłamient z prośbaj raspavieści ab nastupstvach admovy ad takoha dziciaci.

Jak pryznałasia žančyna, na nastupnych sudovych pasiadžeńniach jana źbirajecca adstojvać svajo prava nie być abaviazanaj asobaj:

— Ja nie chaču pradjaŭlać miedykam pazoŭ, bo ŭžo ničoha nie vypravić. Ale sindrom Daŭna — hienietyčnaje zachvorvańnie. Značyć, kletka «złamałasia» jašče pry začaćci. Dakładny skryninh moh by heta vyznačyć. Z-za niedaskanałaści našaj miedycynskaj sistemy majo žyćcio złamana, a niedzie ŭ čužoj chacie zaraz chvoraje dzicia. Kali miedyki buduć viedać, što niasuć adkaznaść, takija vypadki buduć źviedzieny da nula. Liču, što ŭ našym vypadku my nie pavinny nieści vydatki na ŭtrymańnie hetaha dziciaci.

Pavialičyć

— Vy źbirajeciesia jašče naradžać?

— Tak. Mianie ŭžo abnadzieili, što druhaja ciažarnaść budzie pad pilnym kantrolem. Zrablu ŭsio, kab hetaje dzicia naradziłasia zdarovym.

• 0
• 0
• 0
• 0
• 0
• 0
• 0
• 0