Incydent adbyŭsia ranicaj 3 lutaha kala doma №3 na vulicy Janki Kupały ŭ Viciebsku. Z dachu nad padjezdam upali vialikija kavałki lodu i trapili na mašynu Toyota, jakaja naležyć miascovaj žycharcy, mastačcy i fatohrafu Lilii Kulanionak.
Lod na mašynu zvaliŭsia z dachu kala 10 hadzin ranicy. Raźbiłasia zadniaje škło. Častka kavałkaŭ zvaliłasia na kazyrok padjezda, a častka — na ziamlu.
Žančyna da hetaha času ŭ šoku:
— Dobra jašče, što hetyja kryhi nie zvalilisia na maju hałavu, mnie b heta naohuł nie spadabałasia. U mianie vałasy duba stali: kali ja razhladała hetuju dzirku ŭ škle, z dachu ŭ druhi raz syšła cełaja «łavina». Za śpinoj u mianie hruknulisia na ziamlu niekalki vialikich kryh — pamieram jak dźvie cahliny kožnaja.
Žančyna kaža, što baicca ciapier, jak by sychodžańnie lodu nie paŭtaryłasia.
Uron, jak padličyła haspadynia paciarpiełaj mašyny, skłaŭ prykładna 700 rubloŭ: «Heta kali stavić aryhinalnaje tajotaŭskaje škło. Plus tydzień, pakul škło budzie iści pad zakaz, ja budu biez aŭto. Chiba što zaciahnuć plonkaj».
Lilija Kulanionak kaža, što za ŭsiu zimu ni razu nie bačyła, kab na dachu doma čyścili śnieh.
Kamientary