Paźniak abviarhaje słovy Aleksijevič pra staŭleńnie da chvorych dziaciej: Toje, što jana havoryć, — heta Łukašenka №2
Sama Nobeleŭskaja laŭreatka tłumačyć, što pazycyju Paźniaka joj pierakazali zachodnija žurnalisty, piša «Radyjo Svaboda».
Nobeleŭskaja laŭreatka Śviatłana Aleksijevič pierad pasiadžeńniem svajho intelektualnaha klubu ŭ Miensku 26 sakavika, pryśviečanym temie kampramisu, siarod inšaha, vykazałasia pra kiraŭnika Kanservatyŭna-chryścijanskaj partyi BNF Zianona Paźniaka:
«Ja adrazu pryhadała svoj dyjaloh z Paźniakom, jaki niedzie hadoŭ 15 tamu kazaŭ, što ŭ hetuju krainu treba… nivodnaj tabletki, ničoha, niahledziačy na toje, što tam dzieci chvoryja. Takim čynam dyktatura chutčej ruchnie. Kali mianie spytali, ja skazała, što ŭ mianie inšaje mierkavańnie. Kali voś hetyja leki, jakija tam niemcy, švedy źbiaruć, i kali vy ŭratujecie adnaho, dvuch dziaciej, dyk dla mianie heta važniej».
Zianon Paźniak prakamentavaŭ dla Radyjo Svaboda hetuju cytatu:
«Ja z Aleksijevič nieznajomy asabista i nikoli ŭ žyćci ź joj nie razmaŭlaŭ. Toje, što jana havoryć, heta Łukašenka numar 2 — skazać reč, jakuju nichto nia moža pravieryć. Ale heta chłuśnia.
Pa druhoje, [Biełaruski Narodny] Front i ja asabista byli inicyjatarami stvareńnia niekalkich arhanizacyj, u tym liku «Dzieci Čarnobylu», jakija vyratavali tysiačy ludziej, tysiačy dziaciej. Razvozili lakarstvy, vazili dziaciej za miažu. Arhanizacyja «Dzieci Čarnobylu» potym dziejničała samastojna, adna dziejničała ŭ Froncie, dziejničała ŭ Mahilovie. Front pravodziŭ vielizarnuju rabotu pa vyratavańniu čarnobylcaŭ, nia kažučy ŭžo pra zakanadaŭčuju».
U hutarcy z karespandentam Svabody Śviatłana Aleksijevič patłumačyła svajo vykazvańnie na pasiedžańni intelektualnaha klubu:
«Heta byŭ nie dyjaloh, a prosta ŭ jaho była takaja pazycyja, pra jakuju mnie kazali zachodnija žurnalisty. «Voś vy ahitujecie, kab my dapamahali, a ŭ toj ža čas vaš Zianon Paźniak, jaki ciapier za miažoj, ličyć, što takim čynam my dapamahajem dyktatury». A ja skazała, što ŭ mianie inšy pohlad. Što ja pajeździła pa čarnobylskich vioskach, dzie nie było navat bintoŭ i aśpirynu, i ja prašu vas, kali mahčyma, dapamahajcie, bo my dapamahajem dzieciam.
A nakont taho, što jon nieznajomy sa mnoj — my navat niekali vyłučalisia pa adnoj akruzie, razmaŭlali, pakul jon nia źjechaŭ i nia staŭ sa mnoj niazhodny».
Ciapier čytajuć
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary