Vypivocha z Vaŭkavyska narakaje, što čornyja ryełtary pad pahrozaj pistaleta prymusili jaho źjechać u Maskvu
«Čornyja ryełtary» pad pahrozaj pistaleta adabrali kvateru ŭ 33-hadovaha žychara Vaŭkavyska, paviedamlaje MUS. Złačynstva ździejśnili jašče ŭ 2013 hodzie, adnak paciarpieły navažyŭsia zajavić pra jaho tolki praź niekalki hadoŭ.
Mužčyna pražyvaŭ va ŭłasnaj kvatery, adnak mieŭ daŭhi pa kamunalnych płaciažach, bo nie mieŭ pracy i złoŭžyvaŭ ałkaholem. Pra heta viedaŭ i jaho tavaryš, jaki paznajomiŭ vypivochu z 36-hadovym žycharom Vaŭkavyska. U apošniaha ŭźnik złačynny płan.
«Padazravany pačaŭ rehularna naviedvać haspadara kvatery i častavać jaho śpirtnymi napojami, uhavorvajučy pry hetym pradać žyllo. Uzamien hość prapanoŭvaŭ dom u vioscy, skutar i hrošy na žyćcio. U vyniku ŭhavory skončylisia savietam pradać nieruchomaść i źjechać žyć u Rasiju», — raspaviali ŭ HUBAZiK MUS.
Uładalnik «mietraŭ» zapadozryŭ padman i admoviŭsia ad ździełki. Ale heta nie spyniła padazravanaha. Razam z dvuma znajomymi jon siłkom vyviez paciarpiełaha ŭ les, źbiŭ jaho i pad pahrozaj pistaleta prymusiŭ pajści na ździełku. Praŭda, užo na inšych umovach.
«Haspadara kvatery prymusili napisać raśpisku ab atrymańni ad niaviesty padazravanaha $25 tysiač. Hetyja hrošy jon nibyta atrymaŭ u košt budučaha prodažu nieruchomaści. U nataryusa była aformlena ździełka, u vyniku jakoj paciarpieły pazbaviŭsia kvatery i, naturalna, nie atrymaŭ hrošy», - dadali ŭ HUBAZiK MUS.
Zatym mužčynu adpravili ŭ Maskvu, dzie jon pražyŭ kala hoda. Pa viartańni na radzimu złamyśnik pasialiŭ jaho ŭ svaim viaskovym domie.
Kali paciarpieły paviedamiŭ u milicyju pra złačynstva, asnoŭny fihurant užo byŭ asudžany da 9 hadoŭ pazbaŭleńnia voli za kradziež i padpał doma svajho pracadaŭcy. Ciapier u dačynieńni da jaho i dvaich zmoŭščykaŭ ŭzbudžanaja kryminalnaja sprava za vymahalnictva. Praviarajecca ich dačynieńnie da ździajśnieńnia anałahičnych złačynstvaŭ.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ26
Kamientary