Pavieł z Homiela nazyvaje heta aktyŭnaj žyćciovaj pazicyjaj. Ubačyŭšy navinu pra naviedvańnie Alaksandram Łukašenkam pasiołka Bałbasava, jon źviarnuŭ uvahu na toj fakt, što kiraŭnik dziaržavy i jaho ludzi iduć z rovarami ŭ rukach pa prajeznaj častcy pry najaŭnaści dvuch tratuaraŭ. Pra hety fakt jon paviedamiŭ u DAI Homiela. Tam abiacali pravieści pravierku i va ŭsim razabracca, piša ABW.BY.
U minułyja vychodnyja Alaksandr Łukašenka vyrašyŭ prakacicca na viełasipiedzie pa Aršanskim rajonie. Heta była nieaficyjnaja pajezdka, u joj kiraŭnika krainy nie supravadžali ŚMI.
Čytajcie taksama: Łukašenka prakaciŭsia pa Bałbasavie z małodšym synam VIDEA
Na adnym ź videa, raspaŭsiudžanych u sacsietkach, vidać, jak Łukašenka, viedučy ŭ rukach rovar, sychodzić z tratuara na prajeznuju častku i, vidavočna, dalej idzie pa joj. Ź jaho ŭziali prykład i asoby, što supravadžali Łukašenku. I mienavita hety fakt vyklikaŭ pytańni ŭ hamielčuka Paŭła, na vačach jakoha nie raz DAI Homiela štrafavała piešachodaŭ za takoje ž parušeńnie.
— Hetyja kadry raspaŭsiudzili mnohija ŚMI, — kamientuje svajo rašeńnie Pavieł. — Ruch transpartnych srodkaŭ, jak ja zrazumieŭ, nie pierakryvaŭsia, heta było niezapłanavanaje mierapryjemstva, kali tak robiać. Tamu ja paviedamiŭ u dziažurnuju čaść DAI Homielskaha abłvykankama ab fakcie mahčymaha pravaparušeńnia i paprasiŭ, kab tam dali pravavuju acenku tamu, što adbyłosia.
Jak raspavioŭ žurnalistu ABW.BY Pavieł, jamu ŭžo dva razy patelefanavali z DAI. Daišniki paviedamili, što jaho paviedamleńnie pryniali, pa im raspačaty administracyjny praces, paśla zaviaršeńnia pravierki budzie dadziena pravavaja acenka dziejańniam asob, zafiksavanych na videa i fota. Taksama mužčynu paprasili pryjechać u DAI dla praviadzieńnia apytańnia, što jon admoviŭsia rabić, nastojvajučy na tym, kab supracoŭniki DAI apytali jaho ŭ bolš zručnym dla jaho inšym miescy.
Nahadajem, što heta nie pieršy raz, kali hramadzianie tak vostra reahujuć na parušeńni PDR. U kastryčniku 2015 hoda ŭvažlivyja čytačy ŭbačyli, što Łukašenka jeździŭ, nie pryšpiliŭšysia remieniem biaśpieki, pa MKAD-2, testujučy aŭtamabil Geely, sabrany ŭ Biełarusi. Tady Łukašenku nie aštrafavali. Načalnik DAI, jaki nie aštrafavaŭ Łukašenku, zajaviŭ tady žurnalistam, što jon abapiraŭsia na Kanstytucyju krainy.
Čytajcie taksama: Ci aštrafujuć Łukašenku za niepryšpileny remień biaśpieki? FOTAFAKT
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić10
Kamientary