Hahał, smažanka i kiesadzilla. Što i pa čym prapanujuć fud-korty Jeŭrapiejskich hulniaŭ
Napiaredadni Jeŭrapiejskich hulniaŭ my vyrašyli prajścisia pa centry Minska i pahladzieć, čym źbirajucca karmić turystaŭ, kolki kaštuje ježa ŭ fan-zonie i ci adroźnivajecca asartymient ad taho, što my zvyčajna bačym na Dzień horada.
Kirujemsia na Kastryčnickuju płošču, jakaja na čas Jeŭrapiejskich hulniaŭ stała padobnaj da stajanki kačavoj ardy. Nadhlad na ŭvachodzie davoli strohi: zazirajuć navat u tyja kišeni sumki, dzie fizična moža źmiaścicca tolki pašpart. Ale na samoj płoščy, akružanaj trajnoj aharodžaj, pakul što pusta — handal nie paśpieŭ razharnucca. Tolki vałanciory repietujuć cyrymoniju ŭznaharodžvańnia.
U šapiku la ratušy handlujuć chot-dohami pa 3,20 rubla i sanhryjaj pa 3,50 za kubačak. Blinoŭ, zajaŭlenych u mieniu, niama — u takuju śpioku, kažuć, ciesta kiśnie.
— Šmat turystaŭ padychodzić, — zaŭvažaje dziaŭčyna na kasie. — Bačyła anhličan i rasijan. U asnoŭnym biaruć sanhryju i maroziva. Pra viehietaryjanskija chot-dohi taksama pytajucca. My tady ŭ łavaš prosta kładziem kapustu i dadajem sous.
Na terasach susiednich kafe niešmatludna. U restaranie «La ratušy» turystam prapanujuć draniki sa śmiatanaj i mačanku ź blinami za 12 rubloŭ, u pabie «Vyšynia 281» — burhier z harniram z bulby za 18 rubloŭ i file fiermierskaj jałavičyny za 24 rubli.
— My mieniu tydni dva tamu abnavili. Ale heta nie źviazana ź Jeŭrapiejskimi hulniami, — raskazvajuć u pabie. — A zamiežnikaŭ u nas i tak zaŭsiody šmat — niemcy, čechi, palaki. U apošnija dni ich bolš nie stała.
Pakul idziem uniz da Śvisłačy, zaŭvažajem kamunalnikaŭ, jakija farbujuć draŭlanyja šapiki ramieśnikaŭ.
U fan-zonie la Pałaca sportu hučna hraje muzyka. Na fud-korcie pradstaŭleny roznyja nacyjanalnyja kuchni. Voś u italjanskaj pałatcy pradajuć tosty za 4 rubli, kapreze (syr macareła, pamidor i bazilik) za 8 i kavałačak porchetto (smažaniny sa śvininy) za 15. Ceny jeŭrapiejskija, porcyi — biełaruskija.
Pobač — hruzinskaja kuchnia. Šašłyki, chačapury, a taksama lula-kiebab, kiesadzilla… Siaredni ceńnik — 4 rubli.
U pałatcy z tureckim ściaham prapanujuć słodyčy: łukum (pa 9 rubloŭ za kiło) i pachłavu (pa 25 rubloŭ). Tut ža hatujuć paŭkiłahramovuju šaurmu za 7 rubloŭ.
Bolš za ŭsio ludziej pakul što źbiraje azierbajdžanskaja kropka — z dyvanami na ścienach i mini-ekspazicyjaj staražytnaha posudu.
Tut biaspłatnaja dehustacyja. Možna pakaštavać hahał (salonuju bułačku sa śpiecyjami), šekierburu (piečyva z načyńniem z cukru i drablonaha arecha) i vypić hranatavaha soku.
Čym jašče prapanujuć padmacavacca ŭ centry horada hałodnamu turystu? Naprykład, bulbaj fry za 5 rubloŭ za kulok ci sasiskaj u klary na pałačcy za 3 rubli. Zaadno možna padzivicca na robata-transformiera ad traktarnaha zavoda i pryhledzieć paračku piernikaŭ z hłazuraj-vyšyvankaj dla svajakoŭ.
U astatnich pałatkach asartymient taki ž, jak na Dzień horada. Ceny taksama — tańniej byvaje tolki u školnych bufietach u dzień vybaraŭ. Smažanka i sasiska ŭ cieście za 1,50 rubla, piražok z pavidłam za rubiel, čabureki pa 2 rubli… I vynachodnictva biełaruskaha hramadskaha charčavańnia — hamburhier z varanaj kiłbasoj zamiest katlety.
— Šašłyk u asnoŭnym kuplajuć, draniki nie iduć, — dzielicca adna z pradavačak. — Zamiežniki? Ich mała, čaściej našy ludzi padychodziać.
— Bielhijcy ŭčora siadzieli, — raskazvajuć u inšaj pałatcy. — Piva ŭziali i bielašy. Ździŭlalisia, što ŭsio vielmi tanna. Pili, uśmichalisia i paŭtarali: «Okiej, Biełaruś». Napeŭna, spadabałasia im tut.
— Zamiežnikaŭ my adrazu zaŭvažajem — jany adroźnivajucca ad našych ludziej. Prachodziać, hladziać, ale ničoha nie biaruć. Moža, jany nie pryvykli ŭ takich miescach jeści i ŭ darahich kafe siadziać? — razvažaje žančyna na kasie.
Anhielskaj movy jana nie viedaje. Admachvajecca: kali što, u jaje na pryłaŭku lažyć razdrukoŭka z asnoŭnymi frazami. Ale pakul što nie spatrebiłasia.
Ciapier čytajuć
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram13
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2020
Kamientary