Zatrymanyja paśla vybuchu salutu akazalisia rasijanami. Što pra ich viadoma?
U Minsku paśla hibieli žančyny i traŭmaŭ u 10 čałaviek z-za vybuchaŭ na śviatočnym salucie zatrymali dvuch rasijan. Heta supracoŭniki kampanii ź Sierhijeva Pasada, jakaja pastaviła ŭ Biełaruś piratechničnyja snarady. «Moskovskij komsomolec» daviedaŭsia ich imiony — heta Maksim Sapronaŭ i Kanstancin Dzianisaŭ.
Nieviadoma, dzie jany zaraz znachodziacca paśla 12-hadzinnaha dopytu. Juryst kampanii nakiravaŭsia ŭ Minsk, kab zajmacca ich abaronaj. Na pradpryjemstvie śćviardžajuć: Maksim i Kanstancin — prostyja kansultanty, da vyrabu pradukcyi jany nie majuć nijakaha dačynieńnia.
Svajaki i kalehi supracoŭnikaŭ padmaskoŭnaha zavoda piratechničnych vyrabaŭ aburanyja i ličać, što mužčyn schapili pa nieparazumieńni.
Dyrektar pradpryjemstva kateharyčna abviarhaje ŭsie abvinavačańni.
Rasijskija vydańnie adznačaje, što pradpryjemstva ŭžo daŭno supracoŭničaje ź biełaruskimi vajskoŭcami, tamu ŭ Sierhijevym Pasadzie z zadavalnieńniem pahadzilisia vykanać zakaz na Dzień niezaležnaści. A kab mierapryjemstva prajšło biez zaminak, supravadžać adkazny hruz i sačyć za zapuskam na śviacie adpravili dvuch supracoŭnikaŭ — 25-hadovaha Maksima Sapronova i 28-hadovaha Kanstancina Dzianisava.
«Moskovskij komsomolec» piša, što ŭ pryznačany dzień usie naładačnyja raboty vykonvali biełaruskija vajskoŭcy, a rasijanie nibyta tolki nazirali za pracesam.
— Maksim i Kościa znachodzilisia tam jak zvyčajnyja kansultanty, — raspavioŭ dyrektar vytvorčaści Kanstancin Šapavałaŭ. — Jany nie majuć nijakaha dačynieńnia da vyrabu pradukcyi. Pa pasadzie jany inžyniery-kanstruktary. Ich tam nie pavinna było być. Ich adpravili prosta z-za tavaryskich adnosin. Što tyčycca abvinavačvańniaŭ u tym, što pradukcyja niajakasnaja, to pra heta možna kazać tolki paśla praviadzieńnia kompleksnaj ekśpiertyzy.
«Pira-Ros» maje ŭ svaim rasparadžeńni i śpiecyjalnuju aŭtatechniku dla pieravozki hruzaŭ. Jano ŭtvaryłasia 20 hadoŭ tamu ź niekalkich abaronnych pradpryjemstvaŭ. Supracoŭniki kampanii ładziać fiejervierki praktyčna pa ŭsioj Rasii.
Baćki zatrymanych rasiejcaŭ znachodziacca ŭ šokavym stanie. Pa słovach siastry Kanstancina Dzianisava, 3 lipienia brat dasłaŭ mamie SMS, što zatrymlivajecca ŭ Minsku. Pryčynu nie patłumačyŭ. Svajaki aburanyja, što atrymlivajuć infarmacyju tolki praź internet i ŚMI.
Ciapier dakładna nie viadoma, dzie znachodziacca Maksim i Kanstancin. Chłopcaŭ pryvieźli ŭ miascovuju «kutuzku» kala 4-aj ranicy 3 lipienia. I dapytvali ŭ adździele amal 12 hadzin. U Minsk adpraviŭsia juryst «Pira-Ros», jaki budzie vyrašać pytańnie abarony zatrymanych.
Sapronaŭ pracuje na pradpryjemstvie kala 3 hadoŭ Da hetaha skončyŭ instytut mašynabudavańnia. Jaho naparnik uładkavaŭsia na zavod paśla zakančeńnia finansavaj akademii tryma hadami raniej. Siamiej u ich niama.
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2525
Kamientary