Razborki taksistaŭ u Hrodnie: turystka z Polščy stała zakładnicaj situacyi
Kanflikt taksistaŭ adbyŭsia 6 žniŭnia la aŭtavakzała: tak zvanym «bardziurščykam» nie spadabałasia, što na ich terytoryju pryjechaŭ kiroŭca «Jandeksa» i padabraŭ polskuju turystku pa-za čarhoj. Taksisty nie dali prajechać kiroŭcu i zatrymali jaho z klijentkaj na cełuju hadzinu, piša Hrodna.life.
Turystka z Polščy chacieła dajechać z aŭtavakzała da čyhunačnaha i vybrała z usich mašyn aŭtamabil Andreja, jaki stajaŭ na stajancy ź inšymi aŭtamabilami. Ale mašynie nie dali vyjechać.
«Raniej ja klijenta pryvioz na aŭtavakzał. Staŭ na stajanku, dzie stajali pobač inšyja mašyny taksi. Siadzieŭ i čakaŭ u mabilnym dadatku inšych zakazaŭ. U hety momant padjechała polskaja maršrutka. Taksisty pačali padychodzić da ludziej i prapanoŭvać svaje pasłuhi, ja siadzieŭ u mašynie i da mianie sama padyšła turystka. Spytała ci volny, ja skazaŭ «tak». Taksisty pačali joj kazać, što ŭ ich jość svaja mašyna i tut čarha. Žančyna skazała, što ź imi jechać nie choča, bo jany biaruć u niekalki razoŭ bolš i vybrała moj aŭtamabil».
Andrej damoviŭsia z žančynaj i vyjšaŭ z aŭtamabila, kab dapamahčy zahruzić jaje čamadan u bahažnik. Tym časam jaho ŭžo stali abstupajuć taksisty.
«Kazali, što heta ich terytoryja. Jany zabłakavali mnie prajezd inšaj mašynaj i pačali svaje pravy kačać, kazali, što ja nie mahu zajmacca pasłuhami pieravozki. Hrazilisia vyklikać transpartnuju inśpiekcyju. Ja patelefanavaŭ u milicyju i DAI. Pryjechali ŭsie. Kala hadziny my tam raźbirałasia, turystka ŭvieś hety čas siadzieła ŭ mašynie i była ŭ šoku. Paśla ja daviedaŭsia, što jana pryjechała da zubnoha lekara, i da pryjomu płanavała pa horadzie pahulać, ale ŭ vyniku joj pryjšłosia stać śviedkam miascovaha kanfliktu. Milicyi ŭdałosia ŭrehulavać kanflikt i nichto nie pisaŭ zajavu. Turystku ja ŭ vyniku zavioz biaspłatna na čyhunačny vakzał i paprasiŭ prabačeńnia za situacyju. U toj momant za mnoj jechali i sačyli transpartniki. Jak tolki turystka vyjšła, jany padyšli da jaje i spytali: ci davała jana mnie hrošy. Jana skazała, što nie. Ale transpartniki ŭsio roŭna znajšli z-za čaho skłaści na mianie pratakoł».
U mašynie turystka raspaviała Andreju, što ŭ Hrodna jeździć ŭžo hod i nikoli nie karystajecca pasłuhami «bardziurščykaŭ». Vybirać mašynu choča sama.
«Ja razumieju, što hetyja taksisty tam pracujuć, ale klijenta ja ŭ ich nie zabiraŭ i turystka sama da mianie padyšła. Bolš za ŭsio mianie aburyła, jak nachabna jany siabie pavodziać. Pa-adnym jany nie razmaŭlajuć, adrazu nalatajuć bandaj. Biazładździe poŭnaje».
Ciapier čytajuć
Mackievič: Cichanoŭskuju źniać, zamianić, pieraabrać nielha. Nie mučajciesia. Nielha — i ŭsio28
Kamientary