Upieršyniu ŭ Biełarusi buduć sudzić za raspalvańnie varožaści da milicyjantaŭ
Sprava anarchista Dźmitryja Palijenki nakiravanaja ŭ sud. Jaho buduć sudzić za chulihanstva, abrazu słužbovaj asoby i — upieršyniu ŭ Biełarusi — za raspalvańnie varožaści ŭ dačynieńni da sacyjalnaj hrupy «milicyjanty».
Ciapier Palijenka znachodzicca ŭ SIZA. Jaho zatrymali jašče ŭ sakaviku, paśla sutyčki ŭ adnym ź minskich padjezdaŭ.
Pa viersii Palijenki, jaho ŭdaryŭ pjany susied. Pa viersii SK, susied zrabiŭ zaŭvahu Palijenku, jaki kuryŭ u padjeździe, paśla čaho chłopiec raspyliŭ susiedu ŭ tvar bałončyk.
U vyniku na anarchista zaviali adrazu niekalki kryminalnych spraŭ. Jaho abvinavačvajuć u złosnym chulihanstvie za bojku z tym susiedam. Maksimalnaje pakarańnie surjoznaje — da 10 hadoŭ.
Akramia taho, Palijenku abvinavacili ŭ vyrabie hrafici «Mienty zabivajuć» i raspaŭsiudzie videarolika, pryśviečanaha stvareńniu hetaha hrafici. Za heta Palijenku abvinavačvajuć jašče pa dvuch artykułach, adzin ź jakich — raspalvańnie varožaści da milicyjantaŭ. Druhi — abraza słužbovaj asoby, bo ŭ roliku ŭzhadvaŭsia tahačasny ministr unutranych spraŭ Ihar Šunievič.
«Zdajecca, nie sutykalisia jašče z takim precedentam. Heta sapraŭdy budzie pieršy sud za raspalvańnie varožaści da sacyjalnaj hrupy «milicyjanty», — raspavioŭ «Našaj Nivie» pravaabaronca Valancin Stefanovič. — Kaliści ŭ Oršy była zaviedzienaja padobnaja sprava suprać futbolnaha fanata za nadpis ci to na baniery, ci to na cišotcy. Ale tuju spravu spynili, da suda jana nie dajšła»
Stefanovič adznačaje, što abvinavačańnie, na jaho pohlad, sprečnaje.
«My nie ličym, što milicyja — heta sacyjalnaja hrupa. Sacyjalnaja hrupa heta, umoŭna kažučy, hrupa ludziej, jakuju abjadnoŭvajuć nacyjanalnyja, etničnyja prykmiety. Seksualnyja mienšaści taksama mohuć ličycca sacyjalnaj hrupaj. Pradstaŭniki dziaržorhanaŭ, tyja ž milicyjanty, sacyjalnaj hrupaj na dumku niezaležnych pravaabaroncaŭ nie źjaŭlajucca», — skazaŭ Stefanovič.
Kamientary