CNN daviedaŭsia pra sakretnuju evakuacyju aśviedamlalnika ZŠA va ŭradzie Rasii
Ahienta vyvieźli nieŭzabavie paśla sustrečy Trampa ź Siarhiejem Łaŭrovym u Biełym domie. Surazmoŭcy telekanała paviedamili, što nieaściarožnaje abychodžańnie prezidenta ZŠA z sakretnymi dadzienymi mahło pastavić špijona pad pahrozu pravału, pieradaje RBK.
U 2017 hodzie amierykanskija śpiecsłužby praviali sakretnuju apieracyju i vyvieźli z Rasii kaštoŭnaha ahienta, jaki «byŭ adnoj z najbolš vysokapastaŭlenych krynic u rasijskim uradzie». Pra heta paviedamlaje CNN sa spasyłkaj na čynoŭnikaŭ z administracyi prezidenta ZŠA Donalda Trampa.
Pa słovach adnaho z surazmoŭcaŭ telekampanii, rašeńnie było pryniata ŭ tym liku z-za bojazi, što Tramp i jaho administracyja «nieadnarazova niapravilna abychodzilisia z sakretnymi vyvieddanymi» i mahli spryjać vykryćciu špijona.
Adznačajecca, što apieracyju vyrašyli pravieści nieŭzabavie paśla sustrečy Trampa z kiraŭnikom rasiejskaha MZS Siarhiejem Łaŭrovym i Siarhiejem Kiślakom, jaki tady zajmaŭ pasadu pasła Rasii ŭ ZŠA. Padčas sustrečy, jakaja prajšła ŭ mai 2017 hoda ŭ Biełym domie, baki abmierkavali pradstaŭlenyja izrailskaj raźviedkaj sakretnyja dadzienyja, jakija tyčycca dziejnaści terarystyčnaj arhanizacyi «Isłamskaja dziaržava» u Siryi.
CNN ukazvaje, što hetaja infarmacyja nie mieła dačynieńnia da vyvazu ahienta z Rasii, adnak toj fakt, što Tramp raskryŭ jaje Łaŭrovu i Kiślaku, staŭ padstavaj dla supracoŭnikaŭ raźviedki abmierkavać pytańnie ab patencyjnaj niebiaśpiecy vykryćcia krynic infarmacyi.
Praź niekalki tydniaŭ paśla taho, jak było pryniata rašeńnie vyvieźci aśviedamlalnika z Rasii, Tramp na palach samitu G20 u Hamburhu pravioŭ sustreču tet-a-tet z rasijskim prezidentam Uładzimiram Pucinym, a zatym zabraŭ zapisy pierakładčyka. Heta taksama vyklikała aściarohi supracoŭnikaŭ vyviedki.
Jak piša CNN, pra isnavańnie ahienta viedała abmiežavanaja kolkaść supracoŭnikaŭ urada ZŠA i śpiecsłužbaŭ. Pa słovach adnaho z surazmoŭcaŭ, hetamu ahientu nie było «roŭnaj alternatyvy». Toj fakt, što ZŠA zabrali z Rasii vysokapastaŭlenaha špijona, aznačaje, što Štaty zastalisia biez adnoj z klučavych krynic infarmacyi ab unutranaj pracy Kramla i płanach rasijskaha prezidenta ŭ toj čas, jak napružanaść pamiž dźviuma krainami rasła.
Pa słovach vysokapastaŭlenaha supracoŭnika amierykanskaj vyviedki, viartańnie ahienta mieła vialikija nastupstvy, pakolki «adnavić padobnuju mahčymaść za karotki čas niemahčyma», asabliva ŭ Rasii, dzie patrabavańni da biaśpieki vielmi vysokija.
Padrabiaznaści i akaličnaści adklikańnia ahienta CNN nie nazyvaje z bojazi, što jaho mohuć identyfikavać. Telekampanija sa spasyłkaj na supracoŭnikaŭ raźviedki adznačaje, što vyvaz špijona źjaŭlajecca nadzvyčajnaj mieraj, da jakoj prybiahajuć tolki tady, kali padazrajuć, što jon znachodzicca ŭ niepasrednaj niebiaśpiecy.
«Zdahadka CNN pra toje, što CRU prymaje žyćciova važnyja rašeńni na asnovie čaho-niebudź, akramia abjektyŭnaha analizu, źjaŭlajecca łžyvaj», — zajaviła dyrektar upraŭleńnia pa suviaziach z hramadskaściu Brytani Bremieł. Jana taksama nazvała niedakładnaj infarmacyju, što da apieracyi pryviało vykarystańnie prezidentam sakretnych dadzienych, da jakich jon maje štodzionny dostup.
Pradstaŭnik dziaržsakratara ZŠA Majk Pampiea admoviŭsia ad kamientaroŭ. Pres-sakratar Biełaha doma Stefani Hryšam zajaviła, što materyjał CNN «nie tolki niapravilny, ale i moža pastavić žyćcio pad pahrozu».
Kamientary