Pra heta paviedamiŭ Andrej Kim, kiraŭnik kampanii «Kinakonh», jakaja ahučvaje filmy na biełaruskaj movie.
«My vyrašyli parekłamavać nie kankretny film, a sam brend. Tamu prydumali raźmiaščać viadomyja cytaty sa znakamitych filmaŭ pa-biełarusku. Pačać płanavali z «Foresta Hampa». Na płakacie namalavany znakamity kadr, dzie Forest siadzić na łaŭcy i cytata, jakuju jon paŭtaraje na praciahu ŭsiaho filma: «Žyćcio jak skrynka šakaładnych cukierak». Adzinaje adroźnieńnie ad aryhinalnaha kadra ŭ tym, što Forest biełaruskamoŭny, tamu na im vyšyvanka.
Źnizu: «Hladzi kino pa-biełarusku» ― i spasyłka na našu kampaniju ŭ internecie.
Rekłama maksimalna niejtralnaja i biazzubaja. Heta musiŭ być biłbord na eskałatary, — napisaŭ Kim u svaim fejsbuku. —
Dyk voś. Mietro zabaraniła hety biłbord. Im nie spadabałasia cytata ź filma, im nie spadabaŭsia słohan «Hladzi kino pa-biełarusku» (patrabavali zamianić), ale hałoŭnaje patrabavańnie było «pierafarbavać kašulu» (to bok prybrać vyšyvanku).
Heta dla nas nie pieršy raz. U minułym hodzie mietrapaliten zabaraniŭ nam raźmiaščać znakamityja cytaty Karatkieviča, Kołasa, Bahuševiča pra biełaruskuju movu. Paśla doŭhich uzhadnieńniaŭ i pahrozy skandału dazvolili tolki Jakuba Kołasa.
Paśla ŭsiaho hetaha ŭ mianie źjaviłasia ćviordaje razumieńnie, što ŭ mietrapalitenie i adździele ideałohii siadziać vielmi škodnyja ludzi, jakija ci ščyra nienavidziać usio biełaruskaje, ci pierastrachoŭvajucca tak, što robiacca absalutna nieprydatnymi dla hetaj pracy».
Pa słovach Kima, adkaznaja za rašeńnie — načalnica rekłamna-infarmacyjnaha adździeła Śviatłana Zizika.
«Naša Niva» źviazałasia ź Zizikaj, ale jana paviedamiła, što kamientavać ničoha nie budzie.
Kamientary