Prakuratura aficyjna papiaredziła staršyniu baranavickaj supołki Sajuza palakaŭ u Biełarusi pra kryminalnuju adkaznaść za dziejnaść ad imia niezarehistravanaj arhanizacyi.
18 lutaha prakuror Baranavičaŭ Ihar Pałyka vynies aficyjnaje papiaredžańnie staršyni baranavickaj supołki Sajuza palakaŭ u Biełarusi i dyrektaru Doma Polskaha Teresie Sielivončyk. Prakuratura zakidaje joj aktyŭny ŭdzieł u dziejnaści niezarehistravanaha hramadskaha abjadnańnia «Sajuz palakaŭ na Biełarusi» na čale z Anžalikaj Borys. Jaje
vinavaciać u arhanizacyi dastaŭki ŭ Dom Polski drukavanaj pradukcyi, u jakoj «padkreślivajecca kiroŭnaja rola Borys A. u žyćci pałanijnych struktur, što funkcyjanujuć u Respublicy Biełaruś», a taksama «utrymlivajecca tendencyjnaja infarmacyja ab sacyjalna-palityčnaj situacyi ŭ Respublicy Biełaruś». Akramia taho, aktyŭny ŭdzieł Teresy Sielivončyk u žyćci niezarehistravanaj arhanizacyi vyjaŭlajecca ŭ
«rehularnym udziele ŭ schodach prychilnikaŭ Borys A.», a taksama «akazańnia sadziejničańnia» ŭ padrychtoŭcy i praviadzieńni 14-15 sakavika źjezdu arhanizacyi na bazie Doma Polskaha.
U vypadku recydyvu prakuratura budzie stavić pytańnie pra pryciahnieńnie staršyni baranavickaj supołki SPB da kryminalnaj adkaznaści, havorycca ŭ papiaredžańni.
Jak paviedamiŭ pres-sakratar SPB Ihar Bancar, hetaje papiaredžańnie kiraŭnictvam arhanizacyi adnaznačna rasceńvajecca, jak zapałochvańnie. «U čaćviortym punkcie hetaha dakumienta havorycca pra akazańnie sadziejničańnia ŭ padrychtoŭcy i praviadzieńni źjezdu, a zatym robicca papiaredžańnie pra kryminalnuju adkaznaść u vypadku, kali dyrektar Doma Polskaha nie spynić svajoj dziejnaści. A artykuł 193-1 KK — heta da dvuch hadoŭ źniavoleńnia» — adznačyŭ sp. Bancar. Pa jaho słovach,
na sustrečy z prakuroram, akramia T. Sielivončyk i jaje advakata, prysutničaŭ nieviadomy čałaviek, jaki zdymaŭ prysutnych na kamieru.«My rasceńvajem heta, jak pravakacyju i budziem abskardžvać takija dziejańni» – padkreśliŭ pres-sakratar. Ihar Bancar zaznačyŭ, što źjezd adbudziecca ŭ lubych umovach, navat u lesie, ci ŭ adkrytym poli, kali spatrebicca. «Nas moža spynić tolki krajni varyjant – siłavy, kali, kaniečnie, ułady pojduć na heta» – zajaviŭ jon.
Nahadajem, što 14-15 sakavika maje adbycca źjezd niepryznanaha ŭładami Sajuzu palakaŭ na čale z Anžalikaj Borys.
U apošni čas u dačynieńni da siabroŭ SPB pačaścilisia pravakacyi. Tak, u pačatku lutaha na kvatery hrodzienskaha žurnalista Andreja Pačobuta nieviadomyja złamyśniki paškodzili ŭvachodnyja dźviery dy pakinuli pobač cydułku z pahrozami. Taksama nieviadomyja nieadnojčy telefanavali jahonaj dačce. Tym časam, na svaim błohu žurnalist paviedamlaje pra cełuju chvalu cisku na aktyvistaŭ Sajuza palakaŭ z metaj prymusić ich admovicca ad udziełu ŭ dziejnaści arhanizacyi.
Za dziejnaść ad imia niezarehistravanaj arhanizacyi ŭ svoj čas praz sudy prajšli siabry niezarehistravanych arhanizacyj «Partniorstva» i «Małady front». Cimoch Drančuk, Enira Branickaja, Mikoła Astrejka, Alaksandr Šałajka, Źmicier Daškievič adbyvali pakarańnie ŭ turmach.
«Zapuskajcie dalej saluty, a ja vykliču milicyju». Biełarusy spračajucca pra zabaronu na fiejervierki2
Kamientary